«Almaty-Ekaterınbor» tas jolynda jol apatynda ShQO-nyń 22 jastaǵy turǵyny ajal qushty
ASTANA. 28 shilde. QazAqparat - Qaraǵandy oblysynda bolǵan jol-kólik apatynda ShQO-nyń 22 jastaǵy turǵyny ajal qushty, dep habarlady Qaraǵandy oblysy ІІD-niń baspasóz qyzmeti.
Jol-kólik apaty keshe Shet aýdanynyń Aqsý-Aıýly kentinen 5 shaqyrym jerde «Almaty-Ekaterınbor» tas jolynda oryn aldy. Qaraǵandy qalasyna bet alǵan Shymkent qalasynyń turǵyny, «Mazda-626» kóliginiń júrgizýshisi rýlge ıe bola almaı, 24 jastaǵy Pavlodar oblysynyń turǵyny basqarǵan «Nısan Tsefıro» kóligimen soqtyǵysty.
Qatty soqtyǵysýdyń saldarynan «Nısan Tsefıro» kóligi jyraǵa aýdarylyp ketti. Oryn alǵan jol-kólik apatynyń saldarynan ShQO-nyń turǵyny, «Nıssan Tsefıro» kóliginiń 22 jastaǵy jolaýshysy oqıǵa ornynda kóz jumdy. Júrgizýshi men 1984 jylǵy taǵy bir jolaýshy ártúrli jaraqattarmen aýrýhanaǵa jetkizildi. Jol-kólik apatynyń faktisi boıynsha qylmystyq is qozǵaldy, tekserý amaldary júrgizilýde.
Qaraǵandy oblysynyń polıtsııasy turǵyndardy jol erejesin qatań saqtaýǵa, ásirese alysqa sapar shegýde ruqsat etilgen jyldamdyqty asyrmaýǵa shaqyrady.
