Almaty dúńgirshekterden qalaı qutylyp jatyr
ALMATY. QazAqparat - Almaty qalasy Naýryzbaı aýdany ákiminiń apparaty statsıonarlyq emes saýda núktelerimen kúres qalaı júrgizilip jatqanyn málim etti, dep habarlaıdy QazAqparat tilshisi.
Qazirgi ýaqytta Naýryzbaı aýdanynda júrgizilgen monıtorıng nátıjesinde zańsyz 30 dúńgirshek anyqtalǵan. 
«Keıbir dúńgirshekter memleket menshigindegi, keıbiri jeke menshiktegi jerlerge qoıylǵan. Naqtyraq aıtqanda, jerdi qoldaný maqsaty sáıkes kelmeıdi. Mysaly, jer ýchaskesi basynda turǵyn úı salýǵa bólingen bolsa, ony kommertsıalyq maqsatta paıdalanyp otyrǵandar bar. Kóbine, ondaı oryndar zań talaptaryn buzady, ıaǵnı, sanıtarlyq talaptarǵa saı bolmaı, salyqtan jaltarǵan bolyp shyǵady. Sondaı-aq, keıbir dúńgirshekter trotýarlarda, aryq júıelerinde ornalasqan», - deıdi Naýryzbaı aýdany ákiminiń orynbasary Baǵlan Dandybaev.
Atalǵan nysandardyń ıelerimen ákimdik túsindirý jumystaryn júrgizip, sáıkes eskertýler bergen.
«Saýda nysandary zańsyz salynǵan kóptegen adamdar ákimdiktiń zańdy talaptarymen kelisip, óz erikterimen buzyp jatyr. Búgingi tańda osy jolmen 14 nysandy ıeleri ózderi buzdy. Óz erikterimen túsinistik tanytqandarǵa aıyppul salynbaıdy. Al qalǵandaryna ákimshilik sharalar qoldanylady», - dedi Baǵlan Dandybaev. 
