Almaty dúkenderinen talapqa saı emes 112 oıynshyq túri anyqtaldy
2020 jyldyń birinshi jarty jyldyǵynda QR Densaýlyq saqtaý mınıstrligi Taýarlar men kórsetiletin qyzmetterdiń sapasy men qaýipsizdigin baqylaý komıteti Almaty qalasy boıynsha Ulttyq saraptama ortalyǵynyń fılıalyna saraptamaǵa 434 túrli tamaq ónimi men 120 balalar oıynshyǵynyń úlgisi jetkizilgen.
Nátıjesinde ortalyq mamandary 219 azyq-túlik taýarynyń tańbalanýynda zań buzýshylyqtardy anyqtady. Máselen, ónimderdiń quramy, jaramdylyq merzimi, saqtaý sharttary jáne óndirýshi týraly aqparat kórsetilmegen. Sáıkes kelmeıtin synamalardyń eń kóbi (43) kondıterlik jáne nan-toqash ónimderinde boldy. Olar: «Monetkı» kámpıtteri, «Baıan-Sulý» kámpıtteri, «Mır keksov» bıskvıtti torty, «Mummy' s cake», «Mýraveınık» tátti nany, «Dalmatovo» keptirilgen vanıli, «Assortı» qabattalǵan frantsýz toqashtary, kókjıdek qosylǵan belevskaıa pastılasy, «Samelle» pahlavasy, prıanıkter, suly pechenesi, jerjańǵaq qosylǵan keks, «Bal Shyryn» bal qosylǵan tátti nany, «Tımosha» kozınaktary, shokolad dámi bar sırop, saǵyz, «Love is» shaınaıtyn kámpıtter, «Srunchy» jıdekti mıýslıi, bal, qant. Bul ónimder Qazaqstanda, Reseıde, Frantsııada jáne Túrkııada óndirilgen.
Sondaı-aq 33 jemis-kókónis óniminde tańbalaýǵa qoıylatyn talaptar buzylǵan. Olar: «Olevi» tańqýraıdan jasalǵan tosaby, sańyraýqulaq qosylǵan ashytylǵan qyryqqabat, marınadtalǵan jasyl burysh, tabıǵı lecho, «Lazdjan» aşy dámdeýishi, «Tkemalı ODA» soýsy, «Baruto» marınadtalǵan zimbiri, qurma, «Kuhne» kilegeıli jelkegi, «La Molisana» kartop tushparasy, súıegimen konservilengen záıtún, «Pelati» tazartylǵan tutas qyzanaǵy, «Olevi» qulpynaı djemi, muzdatylǵan kókónister, «Aroy-D» kokos kremi, «JıAN SIFÝ» buryshty soýsy, «Mash-Mash» qurmasy, «Elite dates», «Kuhne smoked Pepper BBQ» ystalǵan burysh qosylǵan qyzanaq barbekıý soýsy. Bul ónimder Qazaqstan, Reseı, Qytaı, Iran, Italııa, Germanııa, Taıland elderinde shyǵarylǵan.
Sonymen qatar balyq konservisi, shaı, irimshik, sút, shujyq, makaron ónimderinde tańbalaný talapqa saı emestigi anyqtalyp otyr.
Munan bólek, oıynshyqtardyń 112 úlgisinde tańbalaý boıynsha sáıkessizdikter anyqtaldy.
«Kóbinese tutynýshy oıynshyqtyń ataýyn, óndirýshi el, óndiris orny, ımporttaýshy, maqsaty, materıaldyń quramy, shyǵarylǵan kúni týraly bile almaıdy. Memlekettik jáne orys tilderinde tańbalaý joq. Almaty qalasy boıynsha Taýarlar men kórsetiletin qyzmetterdiń sapasy men qaýipsizdigin baqylaý departamenti tehnıkalyq reglamentter talaptarynyń sáıkessizdigi anyqtalǵan jaǵdaıda barlyq jeke kásipkerlerge Qazaqstan Respýblıkasynyń halyqtyń sanıtarııalyq-epıdemıologııalyq salaýattylyǵy salasyndaǵy zańnamasy talaptarynyń buzylýyn joıý týraly nusqama berdi. Ulttyq saraptama ortalyǵynyń mamandary qazaqstandyqtardy tamaq ónimderi men oıynshyqtardy tańdaýda muqııat bolýǵa shaqyrady. Eń aldymen, ónimdi tańbalaýǵa, onyń qaptamasyna, saqtaý sharttary men jaramdylyq merzimine nazar aýdarý kerek», - dep atap ótedi ortalyqtan.