Almaty dúkenderinde salmonella bakterııasy bar taýyq eti anyqtaldy
ALMATY. QazAqparat - Almaty qalalyq Qoǵamdyq densaýlyqty qorǵaý departamenti azyq-túlik qaýipsizdigi boıynsha monıtorıng jumystaryn júrgizdi. Reıd barysynda eki dúkennen alynǵan taýyq etinen Salmonella taıaqshalarynyń eki túri tabylǵan, dep habarlaıdy QazAqparat tilshisi.
«Smaǵulov» JK, «Zamanbekov» JK (Jetisý aýdany) dúkenderindegi taýyqtyń sany etinen adam úshin qaýipti Salmonella enteritidis, S1 tobyndaǵy Salmonella bakterııalary tabylǵan. Satýshylarda bul ónimniń qaýipsizdigi týraly qujattary da joq bolyp shyqty. Dúken ıelerine aıyppul salynyp, osy ónimderdi jetkizýshilerdi anyqtaý boıynsha jumys júrgizilip jatyr», - dedi departamenttiń baspasóz qyzmetinen.
Sondaı-aq tekserý barysynda qaladaǵy úsh dúken: «Orazalın» jeke kásipkerligi (Áýezov aýdany), «Gýsev» jeke kásipkerligi (Bostandyq aýdany) jáne «Aqmaral» dúkeninen (Medeý aýdany) paıdalaný merzimi ótip ketken tamaq ónimderi anyqtaldy. Dúkenderdiń basshylyǵyna aıyppul salyndy.
Mamandardyń aıtýynsha, jalpy Almaty qalasy boıynsha 6 taǵam óndirýshiniń sanıtarlyq erejelerdi saqtamaǵanyn belgili boldy. Nysandardyń basshylary tártiptik jaýapkershilikke tartyldy.
Almatyda jyl basynan beri 164 sýbektige qatysty ákimshilik is qozǵalsa, 34 is sot organdarynda qaraldy. Jalpy alǵanda 13,6 mln teńge kóleminde aıyppul salyndy.
Aınalymnan jalpy quny 2 mln teńge bolatyn 5 myń 277 keli taýar alynyp tastaldy.
Saýda oryndarynan alynǵan 2469 synamanyń 35,6 % tehnıkalyq reglamentterge saı emes bolyp shyqty.
Illıýstratsııalyq sýret
