Almaty-Dýbaı reısiniń uzaq keshigýiniń sebebi anyqtaldy
ALMATY. QazAqparat - Almaty Halyqaralyq áýejaıy Dýbaı reısiniń bir táýlikten astam keshigýiniń sebebin túsindirdi, dep habarlaıdy QazAqparat tilshisi.
Áýejaı ókilderiniń sózine sensek, FlyDubai áýe kompanııasynyń Almaty-Dýbaı reısiniń ushý ýaqyty áýejaı qyzmetine qatysy joq sebeptermen tórt ret keshiktirilgen.
«Keste boıynsha osy reıs Almaty áýejaıynan 6 aqpan kúni tańǵy 04:50-de ushýy tıis bolatyn. Jolaýshylar tirkeýge kesheýildep shaqyryldy. Olar tirkeýden ótti, júkterin tapsyryp, ushaqtaǵy óz oryndaryna jaıǵasyp ta úlgerdi.
09:30-da jolaýshylardan salonnan shyǵa turýdy surady. Sóıtse, ekıpajdyń ruqsat etiletin ushý ýaqyty bitken eken. «Ekıpajdyń demalýyna» baılanysty, ushý ýaqyty 22:00-ge jyljytyldy.
16:00-de áýejaıdyń dıspetcher qyzmeti reıstiń ushý ýaqyty tehnıkalyq sebepterge baılanysty, 7 aqpan, 05:05-ke aýystyrylǵanyn habarlady. Keıin, jolaýshylar laınerdiń bortynda otyrǵan kezde ekıpaj generatordyń aqaýy bar ekenin anyqtaǵan», - dep málimdedi Almaty Halyqaralyq áýejaıynyń baspasóz qyzmeti.
Reıske qaıta tirkeý 03:00-te ashylyp, 05:30-da aıaqtaldy. Áýe kompanııasy ushý ýaqytyn odan keıin de eki ret keshiktirdi: tehnıkalyq sebepterge baılanysty 06:50-ge, sodan keıin taǵy bir saǵatqa. Sońynda, reıske otyrǵyzý 09:15-te bastalyp, 09:56-da ushaq áýege kóterilgen.
«Osynshama ýaqyt boıy ushaqtyń ushýyn kútip, suraǵyna jaýap almaǵan, ushaqtyń keshigý sebepterin anyqtaý múmkindigi bolmaǵan jolaýshylar, buǵan árıne narazy boldy. Alaıda, áleýmettik jelide aıtylǵandaı, olardyń áýejaıda tártipsizdikter jasaǵany shyndyqqa janaspaıdy. Reıske tirkeıtin jerge kelip, daýys kótere narazylyq bildirgeni ras. Áýejaıdyń avıatsııalyq qaýipsizdik qyzmetiniń qyzmetkerleri jáne jelilik polıtsııa bóliminiń ókilderi jolaýshylardy sabyrǵa shaqyryp, jyldam tártip ornatty», - deıdi áýejaı ókilderi.
Almaty Halyqaralyq áýejaıy oqys oqıǵaǵa baılanysty FlyDubai áýe kompanııasyna resmı túsinik berýin talap etip, saýal joldady.
