Almaty departamenti órt sóndirýshilerdi jumysqa shaqyrady

ALMATY. QazAqparat – Almaty qalalyq tótenshe jaǵdaılar departamentinde 250- den astam bos jumys orny bar. Bul týraly onlaın brıfıng barysynda departamenttiń kadr saıasaty bóliminiń basshysy Aqjoltaı Ábilázimov málim etti, dep habarlaıdy QazAqparat tilshisi.

Onyń aıtýynsha, QR Tótenshe jaǵdaılar mınıstriniń buıryǵyna sáıkes osy jyldyń basynan beri Almaty qalasy TJD-niń órt sóndirý men apattyq qyzmetinde shtattyq jumys orny artty.

«Osyǵan baılanysty qatardaǵy jáne kishi basqarýshy quramdy qosqanda 250-den astam bos oryn bar. Atap aıtqanda, órt sóndirýshiler men júrgizýshiler»,- deıdi spıker.

Sonymen qatar ol azamattyq qorǵaý organdaryna jumysshylar qandaı tártippen iriktep altynatynyn aıtyp berdi.

«Bizdiń qyzmetke 18 ben 35 jas aralyǵyndaǵy azamattar jumysqa ornalasa alady. Olar áskerı boryshyn ótegen nemese QR-nyń zańyna saı áskerı mindetin keıinge shegergen bolýy kerek. Bilimi ortashadan tómen bolmaýy kerek.

Sondaı-aq kásipkerlikpen aınalyspaıtyn jáne qylmystyq jaýapqa tartylmaǵan bolýy shart. Azamat óziniń jeke jáne iskerlik qasıetterimen dene daıyndyǵy men densaýlyq jaǵdaıy boıynsha ózine júktelgen qyzmettik mindetterdi oryndaýǵa qabiletti bolýy kerek»,- deıdi Aqjoltaı Ábilázimov. Kadr saıasaty bóliminiń basshysy qyzmetke kirý úshin azamattar «Quqyq qorǵaý qyzmeti týraly» Qazaqstan Respýblıkasynyń Zańynda aıqyndalǵan biliktilik talaptaryna sáıkes kelýi qajet ekenin atap ótti.

«Azamattardy qyzmetke irikteý birneshe kezeńnen turady. Qazaqstan Respýblıkasynyń qoldanystaǵy zańnamasyn bilýge test tapsyrý, áskerı-dárigerlik komıssııadan ótý, dene shynyqtyrý daıarlyǵy normatıvterin tapsyrý. Barlyq kezeńderden oıdaǵydaı ótken úmitker bastapqy kásibı daıyndyqtan ótý úshin Almaty qalasynda ornalasqan Oqý ortalyǵyna jiberiledi. Oqý ortalyǵyna qatysyp jatqandar úsh ýaqyt tamaqpen jáne jatyn orynmen qamtamasyz etiledi. Oǵan qosa 113 000 - 117 000 teńge kóleminde eńbekaqy tólenedi,-dedi spıker.

Órt sóndirýshiler úshin bastapqy kásibı daıyndyq - 35 kúntizbe kúni. Júrgizýshiler úshin – 14 kún, ózge qyzmetter boıynsha – 7 kún. « Azamattyq qorǵaý organdaryndaǵy jumysqa qyzyǵýshylyq tanytqandar bolsa, onda Almaty qalasy, Qonaev kóshesi, 132 mekenjaıy boıynsha ornalasqan Almaty qalasy Tótenshe jaǵdaılar departamentiniń «Órt sóndirý jáne avarııalyq-qutqarý jumystary qyzmetini» kadr saıasaty bólimine nemese 8 [phone] telefony boıynsha habarlasýǵa bolady»,- deıdi departament ókili.