Almaty densaýlyq saqtaý basqarmasynyń basshysy oqshaýlanyp, jumysynda qonyp júr
ALMATY. QazAqparat – Almaty qalalyq Qoǵamdyq densaýlyq saqtaý basqarmasynyń basshysy Tileýhan Ábildaev 14 kúnge oqshaýlanǵan. Qazir ol jumysyna qonyp júr. Bul týraly onlaın brıfıngte aıtyldy, dep habarlaıdy QazAqparat tilshisi.
«Men 6 kún buryn ortalyq klınıkalyq aýrýhanaǵa bir naýqasty qaraýǵa barǵan bolatynmyn. Ol kezde menimen sol mekemeniń bas dárigeri men bólim meńgerýshisi boldy. Sondyqtan da men vırýs juqtyrǵandarmen baılanysta bolýym yqtımal bolǵandyqtan 14 kúnge oqshaýlanýǵa bel býdym», - dedi basqarma basshysy.
Tileýhan Ábildaev karantın bastalǵaly beri 3 ret test tapsyrǵan. Úsheýinde de teris nátıje kórsetilgen.
«Qazir men halyqqa juqtyrmaý úshin óz ofısimde qonyp júrmin», - dedi basqarma basshysy.
Aıta ketý kerek, Almatyda Ortalyq klınıkalyq aýrýhanada koronavırýs ınfektsııasyn dárigerler jappaı juqtyra bastady.
Qazir aýrýhana karantınge jabylǵan. Barlyq baılanysta bolǵan dárigerler «Kóktem» shıpajaıynda jatyr.
