Almaty dárihanalarynda medıtsınalyq maska jetkilikti — ákimdik
ALMATY. QazAqparat – Almaty dárihanalarynda medıtsınalyq maska jetkilikti, tapshylyq bolmaıdy. Bul týraly Almaty qalasy ákimdiginiń dári-dármekpen qamtamasyz etý jónindegi úılestirýshisi Zańǵar Sálimbaev onlaın brıfıng barysynda aıtty, dep habarlaıdy QazAqparat tilshisi.
«Maýsym aıynyń aıaǵynda Almatyda keıbir dári-dármek pen medıtsınalyq maskaǵa suranys óte joǵary boldy. Qajetti dárilerdi qalaǵa jetkizý máselesin sheshý úshin kelisimshart jasaldy. Qazir biraz dári qalaǵa jetkizilip, naryq turaqtandyryldy. Aldaǵy kele jatqan kúzgi-qysqy maýsymdyq aýrýdy eskere otyryp qala ákimdigi turaqtandyrý qoryn qurdy», - dedi ol.
Onyń aıtýynsha,turaqtandyrý qory esebinen dárihanalarǵa jetkiziletin dári –dármek jarty jylda 40 mln qorapty quraıdy.
«Búgingi tańda 26,8 mln qoraby Almaty qalasyna jetkizildi. Turaqtandyrý qorynyń 40 paıyzy qoımalarda bolýy kerek. 40 paıyz degenimiz 8 mln qorapty quraıdy. Sonymen qatar, 19,5 mln jeke qorǵanys quraldary satyp alynady. Onyń ishinde bir ret nemese kóp paıdalanatyn kostıýmder, qolǵap, úsh qabatty maska, respırator, bahıl jáne bas kıimder bar. Naýryzda Almaty qalasyna kúndelikti medıtsınalyq maskany jetkizip turý úshin maska shyǵaratyn «Dolce-Pharm» JShS-men kelisim jasalǵan. Sonymen qatar, maska qoryn kóbeıtý úshin «SQ farmatsııa» kompanııasymen másele pysyqtalyp jatyr. Sondyqtan, qalada medıtsınalyq maska men buıymdar tapshylyǵy bolmaıdy. Bári jetkilikti», - deıdi Zańǵar Sálimbaev.
