Almaty dárigerleri jasaǵan otadan soń baldaqqa súıengen áıel júrip ketti

Ota sátti ótip, baldaqqa súıenip qalǵan áıel jumysqa shyǵyp ketti.

33 jastaǵy Baljan Maqulbekova týǵaly beri jambas urshyǵynyń týa bitti dısplazııasy dertimen aýyrǵan.

«Bala kezimnen beri 3 ret ota jasaldy. San súıeginiń joǵarǵy jaǵyn syndyryp, súıekti qısyq bitirip urshyqqa qondyrmaq boldy. Biraq otalar sátsiz boldy. Sodan keıin baldaqqa súıenip qaldym. Kóp júre almaıtynmyn. Bir aıaǵym ekinshisinen uzyn boldy. Jıi aýyratynmyn», - dedi Baljan Maqulbekova.

Múmkindigi shektelip qalǵan áıel №7 aýrýhana dárigerlerinen kómek surap kelgen.

«Eki urshyqtyń basy týa bitti shyǵyp ketken. Buryn kishirek kezinde súıekterin syndyryp urshyq basyna otyrǵyzýǵa tyrysqan. Jambas súıegi dıpslazııasy óte qıyn aýrý. Ol durys emdelmese múgedektikke ákeletini ras. Sodan Baljannyń oń aıaǵyna byltyr ota jasadyq. Býynǵa endoprotez ornattyq. Ota sátti ótkeni sonshalyq, patsıent birden baldaǵyn tastady. Aýyrsyný sezimi joıyldy. Sol jaq aıaǵynyń emi kúrdelirek boldy. Óıtkeni, urshyqtyń basy joq, jambas urshyǵy joq boldy. Qısyq súıekke protez ornatý qıyn. Urshyq basy joǵary ketip qalǵan. Osylaısha ornyna qoıyp, protez saldyq. Aıaǵyn uzartyp ekeýin teńestirdik. Ota 3-4 saǵatqa sozyldy. Qazir aıaǵynyń aýyrǵany qoıdy. Naýqas ózi júrip turyp qozǵalyp júr», - dedi №7 qalalyq klınıkalyq aýrýhanasynyń ortohırýrgııa bóliminiń meńgerýshisi Arnat Baızaqov.

Endi Baljannyń aıaǵyndaǵy protez 20 jylǵa shydas beredi degen boljam bar.

Qazir áıel №1 aýrýhananyń janynda ashylǵan ońaltý ortalyǵynda ońaltý protsedýralarynan ótip jatyr.

Mamandardyń aıtýynsha, bundaı ota Qazaqstannyń kez-kelgen aýrýhanasynda jasalmaıdy.

«Ota jasaý úshin myqty maman, qajetti qurylǵylar kerek bolady. Kez-kelgen aýrýhananyń ortohırýrgııa bólimi bundaı materıaldyq tehnıkalyq bazamen maqtana almaıdy», - dedi Arnat Baızaqov.

Aıta ketý kerek, operatsııa portal arqyly kvotamen jasaldy.