Almaty dárigerleri jambas súıegi synǵan 94 jastaǵy ájeni aıaǵyna tik turǵyzdy
ALMATY. QazAqparat – Ortalyq qalalyq klınıkalyq aýrýhanaǵa 94 jastaǵy naýqas shuǵyl jetkizildi. Dárigerler oǵan kúrdeli joǵary tehnologııalyq operatsııa jasady, dep habarlaıdy QazAqparat tilshisi.
Aýrýhananyń baspasóz qyzmetiniń málimetinshe, dárigerler qart ájeıge súıek synyqtarynyń yǵysýy men oń jaq jambas súıeginiń jabyq túrdegi synýy dıagnozyn qoıdy.
Dárgerler naýqasqa súıektiń kúrdeli synyqtaryn emdeýge arnalǵan joǵary medıtsınalyq tehnologııany qoldana otyryp operatsııa jasady.
Otaǵa ortoped-dáriger Berik Ospanov jetekshilik etti.
«Jabyq repozıtsııa- bul biz synyq ornyn tolyǵymen ashpaı, eki kishkentaı jyryq arqyly shaǵyn ınvazıvti tásilmen baqylaýshy rentgen apparatymen kirip, synyqtardy qalpyna keltiremiz. Osy operatsııany jasaǵan kezde súıekter tez tutasady. Operatsııa bir saǵatqa sozylyp, sátti aıaqtaldy. Kelesi kúni operatsııadan soń ájemiz júris arbasymen jyljyp qozǵala bastady. Búgin patsıent saýyǵyp úıine shyqty», - dedi Berik Ospanov.
