Almaty dárigerleri jambas súıegi synǵan 100 jastaǵy ájeni aıaǵyna turǵyzdy
ALMATY. QazAqparat – Almatydaǵy №7 qalalyq klınıkalyq aýrýhanaǵa 100 jastaǵy naýqas shuǵyl jetkizildi. Dárigerler oǵan kúrdeli joǵary tehnologııalyq operatsııa jasady, dep habarlaıdy QazAqparat tilshisi.
Aýrýhananyń baspasóz qyzmetiniń málimetinshe, dárigerler qart ájeıge súıek synyqtarynyń yǵysýy men sol jaq jambas súıeginiń jabyq túrdegi synýy dıagnozyn qoıǵan.
Naýqastyń jasy ulǵaıǵanyn, qatar júretin aýrýlardyń bolýyn eskere otyryp, dárigerler – kardıolog, ınternıst, anestezıolog shuǵyl keńes ótkizdi.
Jasalǵan ota túri - sol jaq jambas býynynyń Strayker protezimen totaldy tsementsiz artroplastıkasy. Operatsııa joǵary deńgeıde ótti, 7 aýrýhananyń dárigerleri 100 jastaǵy ájeni aıaǵyna tik turǵyzdy
Travmatolog-dáriger Baýyrjan Óteshevtiń aıtýynsha, operatsııa sátti ótti. Naýqas ota jasaǵannan keıin ekinshi kúni reanımatsııadan polıtravma bólimshesine aýystyryldy.
Dárigerler 100 jastaǵy naýqasta súıek tinderi jasyna sáıkes kelmeıtinin atap ótti, onyń mıneraldy tyǵyzdyǵy joǵary, bul 50 ári ketse 60 jastaǵy adamdarǵa tán.
Naýqastyń qyzynyń sózine qaraǵanda, bul eń aldymen ómir salty, tańerteńgi gımnastıkamen, sodan keıin gıgıenalyq protsedýralardan bastalatyn anasynyń kúndelikti durys rejımimen baılanysty. Tamaqtaný da áser etedi: ol tek úı taǵamdaryn kishkene bólikterde, qatań belgilengen ýaqytta qabyldaıdy, qýyrylǵan taǵamdardy tutynbaıdy, sút ónimderine artyqshylyq beriledi.
Qazirgi ýaqytta naýqastyń jaǵdaıy turaqty, ózin jaqsy sezinedi, úıine shyǵýǵa daıyndalýda.
«Tósekke tańylmaǵanym úshin birinshi Allaǵa, odan keıin dárigerlerge myń alǵys. Anestezııany jeńil kóterdim. Shamasy, zamanaýı preparattar jaqsy jáne dárigerlerdiń kózqarasy óte zor boldy. Olarǵa óte rızamyn. Qazir operatsııadan keıin men ózimdi jaqsy sezinemin», - dedi ǵasyr jasaǵan ájeı.
