Almaty dárigerleri shala týǵan úshemdi úıine shyǵardy
ALMATY. QazAqparat – Almaty dárigerleri shala týǵan úshemdi perzenthanadan shyǵardy, dep habarlaıdy QazAqparat tilshisi.
Júkti kelinshek 32 aptasynda preeklampsııa men qan qysymy kóterilip aýrýhanaǵa shuǵyl jetkizilgen.
Preeklampsııa dıagnozy búırektiń qalypty jumys jasamaýynan qan qysymy kóterilip, áıel adamnyń denesi isingende qoıylatyn dıagnoz.
Júkti áıelderdiń 5-10 paıyzynda preeklampsııa dıagnozy kezdesedi. Bul jaǵdaıda ana men balanyń ómirine 12 ese úlken qaýip tónedi.
Júktiliktiń 32 aptasynda túsken kelinshek qursaǵynda úshem bolǵandyqtan dárigerlerdiń erekshe baqylaýyna alyndy.
Balalar kardıohırýrgııasy men perınataldyq ortalyq dárigerleri úsh qyz balany merziminen buryn kesir tiligimen alý týraly sheshim qabyldady.
Balalardyń salmaǵy 1755 gramm, 1832 gramm jáne 1538 gramm bolǵandyqtan jaǵdaılary aýyr dep baǵalandy.
«Shala týǵan shaqalaqtar jansaqtaý bóliminde 9 kún jatty. Taǵy 19 kún patologııa bóliminde em qabyldady», - dedi ortalyq dırektory Ǵanı Bodyqov.
Mamannyń aıtýynsha, perzenthana bólimshesinde neonataldyq blok barlyq qajetti qural jabdyqpen qamtylǵan. Munda shala týǵan balalardy aman alyp qalýǵa barlyq múmkindik bar.
Búgin úshem 2195 gramm, 2043 gramm, 1989 gramm salmaq jınaǵan soń úılerine shyǵaryldy.
