Almaty dárigerleri polıtseı qaqqan oqýshynyń jaǵdaıy týraly aıtyp berdi
ALMATY. QazAqparat - Almaty dárigerleri patrýl kóligi qaǵyp ketken mektep oqýshysynyń jaǵdaıy týraly málimet berdi, dep habarlaıdy QazAqparat tilshisi.
Almaty Densaýlyq saqtaý basqarmasy basshysy orynbasarynyń mindetin atqarýshy Nurjan Isabekovtyń aıtýynsha, 2007 jyly týǵan, jol-kólik oqıǵasynan zardap shekken oqýshy keshe 4-shi qalalyq aýrýhanaǵa jetkizilgen.
Balany dárigerler tekserip bolǵan soń, balalarǵa jedel kómek kórsetý ortalyǵyna aýystyrǵan. Onyń qany tekserilip, súıekterin tartty.
«Balaǵa shaǵyn ınvazııalyq ota jasaldy. Onyń ahýaly qanaǵattandyrarlyq. Sıraǵy synǵan (baltyr súıegi). Túnde tynysh uıyqtady», - dedi Isabekov.
Mamannyń aıtýynsha, bas súıegi de tekserilgen. Naýqas 10-12 kún shamasynda dárigerler baqylaýynda bolady.
Aıta keteıik, Almatyda patrýl kóligimen oqýshyny qaǵyp ketken polıtsııa qyzmetkeri jumysynan bosatylǵany týraly qalalyq ІІD baspasóz qyzmeti habarlaǵan bolatyn.
«Tártiptik komıssııanyń sheshimimen, Almaty qalasy ІІD basshysynyń 13 naýryzdaǵy buıryǵymen, jaıaý júrginshini qaqqan kezde kólik rýlinde bolǵan Almaty qalasy ІІD ÁPB JPP QQ aǵa ınspektory, polıtsııa aǵa leıtenanty N.Tumabaev ishki ister organyndaǵy jumysynan shyǵaryldy, sondaı-aq onyń serigi, Almaty qalasy ІІD ÁPB JPP QQ aǵa ınspektory, polıtsııa aǵa leıtenanty B.Kembebaev ta laýazymynan bosatyldy», - delingen ІІD baspasóz qyzmetiniń habarlamasynda.
Qazirgi ýaqytta atalǵan jol-kólik oqıǵasyn tergeýmen qalalyq ІІD Tergeý basqarmasy aınalysýda. Jaıaý júrginshini qaǵyp ketken júrgizýshi zań talaptary boıynsha jaýapqa tartylady. Óndiristegi iske qatysty qajetti saraptamalar taǵaıyndalady.
Eske sala ketsek, 13 naýryz kúni tańerteń Almatyda 2007 jyly týǵan mektep oqýshysyn jaıaý júrginshi jolaǵynda jol-patrýl polıtsııasynyń kóligi qaǵyp ketti.
