Almaty dárigerleri menıngıtke shaldyqqan sarbazdy emdep jazdy
ALMATY. QazAqparat - Almatyda dárigerler menıngıtke shaldyqqan sarbazdy emdep jazdy, dep habarlaıdy QazAqparat tilshisi.
Patsıent mamyr aıynyń sońynda avıatsııalyq jedel járdemmen Shyǵys Qazaqstan oblysynan Almaty qalalyq juqpaly aýrýlar aýrýhanasyna aýyr jaǵdaıda jetkizilgen bolatyn. Ol alǵashynda jasandy tynys alý apparatyna qosylǵan edi.
Bir apta boıy medıkamentozdy uıqyǵa jiberilip, jansaqtaý bóliminde jatty. Sarbazǵa antıbakterıaldyq em jasaldy.
Statsıonarlyq bólim basshysynyń orynbasary Tamara Utaǵanovanyń aıtýynsha, naýqas menıngokokk juqpasynyń aýyr túrine shaldyqqan.
«Jasalǵan emniń arqasynda patsıenttiń beti beri qarady. Qazir onyń jaǵdaıy birqalypty dep baǵalanyp otyr. Naýqas Almatydaǵy UQK gospıtaline aýystyryldy. Qazir onyń jaǵdaıyna qaýip tóndiretin eshteńe joq», - dedi Tamara Utaǵanova.
Soldat ınfektsııany Shyǵys Qazaqstan oblysyndaǵy áskerı bólimshede juqtyrǵan. Ol boryshyn óteýge Qaraǵandy oblysynan shaqyrylǵan.
