Almaty dárigerleri laıyqty jalaqyǵa qashan qol jetetinin kezdesýge barǵan depýtattan surady
ALMATY. QazAqparat - Almatydaǵy 12-shi qalalyq klınıkalyq emhana ujymy Májilis depýtaty Gúljan Qaraǵusovamen kezdesýde jalaqy men zeınetaqy máselesin kóterdi, dep habarlaıdy QazAqparat tilshisi.
Saılaýshylarymen kezdesýde depýtat G.Qaraǵusova Bostandyq aýdanyndaǵy iri klınıkalyq emhana ujymymen kezdesti.
Dárigerler depýtatqa kókeıinde júrgen saýaldardy tikeleı qoıýǵa múmkindik aldy. Dárigerlerdiń deni laıyqty jalaqy men zeınetaqy aýdarymdary týraly suraqtaryn qoıdy.
«Bizdiń elde zeınetaqy úsh deńgeıden turady. Zeınetaqymen qamsyzdandyrý júıesiniń bazalyq, mindetti (yntymaqtas jáne jınaqtyq) jáne erikti deńgeıleri bar. Zeınetaqy - únemi retke keltirip otyratyn júıe. Eger deńgeı bolmasa, zeınetaqy kólemi tómendeı beredi. Qazir biz memlekettiń azamaty retinde kez kelgen adam alatyn bazalyq zeınetaqyny kóbeıtip kelemiz. Biraq, eń bastysy - ol jınaq júıesi. Damyǵan elderde kárilikke jas kezinen jınaqtaý arqyly daıyndalady», - dedi depýtat.
«Qazir olar jınaqtaý júıesin jetildirýdi oılastyryp jatyr. Munyń aıtarlyqtaı jaýapkershiligi bar. Memlekettik - bazalyq júıe bolsa, adamnyń ózi jınaqtaýshy. Sondyqtan biz, zeınetaqy alymyn mindetti qyldyq. Sondyqtan, bul jerde eshteńe ózgermeıtin bolady. Jınaqtaý júıesinde siz qanshalyqty jınaıtynyńyzǵa baılanysty. Qansha jumys jasaǵan eńbek ótilińiz bul jerde mańyzdy emes. Sondyqtan, eńbek ótiline qaraıtyn abyroıly zeınetaqy júıesi birtindep ketip barady», dedi ol.
Elimizde mindetti medıtsınalyq saqtandyrý júıesi juzege asyrylǵaly jatyr. Dárigerler depýtattan bul reformanyń jalaqyǵa qalaı áser etetinin surady.
«Medıtsınalyq saqtandyrýdyń eń bir ońtaıly jaǵy sapa deńgeıin kóterip qana qoımaı, bilikti dárigerlerdiń de eńbegin laıyqty baǵalaıdy. Onyń mehanızmderi áli de jetildirý satysynda. Alaıda, ózge elderdiń tájirıbesine súıene otyryp, aıtatyn bolsaq, bilikti dárigerler bul júıede jaqsy jalaqyǵa qol jetkizetin bolady. Bul óz qoldaryńyzda. Arnaıy mamandar ǵana emes, medbıkeler de medsaqtandyrýdyń paıdasyn kóretin bolady, tek sanıtarlyq qyzmetkerlerde ǵana ózge keste bolady», - dedi depýtat.
