Almaty dárigerleri qulaqsyz týǵan balalarǵa biregeı ota jasamaq
ALMATY. QazAqparat – Almatyda dárigerler qulaqsyz týǵan balalarǵa qabyrǵa etinen qulaq qalqanyn jasap bermek. Biregeı otany S.Asfendııarov atyndaǵy qazaq ulttyq medıtsınalyq ýnıversıtetiniń jaq jáne bet hırýrgy Narıman Satylǵanov qolǵa almaq, dep habarlaıdy QazAqparat tilshisi.
Dáriger mıkrotııa dıagnozymen týǵan balalarǵa kómektespek.
Mıkrotııa – qulaq qalqanynyń damymaı qalýy nemese múlde bolmaýy 8000-10 000 balanyń arasynda 1 balada kezdesedi.
«Qazaqstanda osy dıagnozben týǵan balalar óte kóp. Biraq olarǵa eshqandaı kómek kórsetilmeıdi. Men olardyń qulaǵyna rekonstýrktsııalyq ota jasaımyn. Qulaq qalqanyn balanyń óz qabyrǵa etinen jasap beremin. Ota 6 saǵatqa sozylady. Bundaı otalar Amerıkada 100 myń dollar, Eýropada – 60-70 myń dollar turady. Bizde qajetti lıtsenzııanyń barlyǵy bar», - dedi dáriger .
Qazir artrezııa (qulaq kanalynyń joq bolýy) jáne mıkrotııa dıagnozy bar Qazaqstandaǵy balalar shetelde emdelýge májbúr.
2018 jylǵy málimetke sáıkes, Qazaqstanda osyndaı dıagnozben 600 bala ómir súrip jatyr. Olardyń birazynyń bir jaq qulaǵy ǵana estıdi.
QR DSM komıssııasy 66 balany shetelge emdelýge jibergen.
