Almaty dárigerleri koronavırýsqa qarsy revaktsınatsııadan belsendi ótip jatyr

ALMATY. QazAqparat - №1 qalalyq klınıkalyq aýrýhananyń 400-den astam qyzmetkeri koronavırýsty ınfektsııaǵa qarsy revaktsınatsııadan ótti, dep habarlaıdy QazAqparat tilshisi.

Almatynyń barlyq egý pýnkterinde vaktsınatsııamen qatar halyqty COVID-19-ǵa qarsy revaktsınalaý da júrip jatyr.

Birinshi kezekte qaıta vaktsınany halyqpen tikeleı jumys isteıtin mamandar alady.

Olardyń qatarynda quqyq qorǵaý organdarynyń qyzmetkerleri, medıtsına qyzmetkerleri, muǵalimder jáne sozylmaly aýrýy bar osal toptardyń azamattary jáne taǵy basqalary bar.

№1 qalalyq klınıkalyq aýrýhananyń epıdemıolog dárigeri Elmıra Aýǵalıevanyń aıtýynsha, emhanada aýrýdyń aldyn alý jáne taralýyn boldyrmaý maqsatynda qyzmetkerler QazVac, Vero Cell, Pfizer, Sputnik laıt vaktsınalarymen egildi.

«Búgingi kúni №1 qalalyq klınıkalyq aýrýhananyń 445 qyzmetkeriniń 417- si revaktsınatsııadan ótti. Qalǵan 28 maman revaktsınatsııa ýaqyty kelgende egiledi», - dedi ol.

Sonymen qatar, dáriger birqatar vaktsınanyń úshinshi dozasy engizilgende ınfektsııany «beıtaraptandyratyn» antıdene deńgeıi joǵarylaıtynyn atap ótti.

«Qazaqstandyqtardyń vaktsınatsııaǵa, onyń ishinde tumaý men koronavırýsqa qarsy ekpege degen kózqarasy ártúrli. Bireýi dári-dármekke senbeıdi, endi biri asqynýdan qorqady. Jappaı egý - qazirgi densaýlyq saqtaýdyń eń tıimdi profılaktıkalyq úlgileriniń biri», - deıdi epıdemıolog.