Almaty dárigerleri ınsýltti emdeýdiń jańa ádisimen tanysty
ALMATY. QazAqparat - Almatyda №7 qalalyq klınıkalyq aýrýhana bazasynda «Tserebraldy angıonevrologııanyń ózekti máseleleri» atty ǵylymı praktıkalyq konferentsııa ótti, dep habarlaıdy QazAqparat tilshisi.
Jıyn aıasynda nevrolog mamandar sheteldik qonaq, Reseı medıtsınalyq ǵylym akademııasynyń akademıgi, professor Aleksandr Skorometstiń sheberlik saǵatyn tyńdady. Sheteldik maman qala dárigerlerin ınsýlt sııaqty aýyr dertti anyqtaý men emdeý ádisterimen tanystyrdy.
«Insýlt adam densaýlyǵy úshin asa qaýipti aýrýlardyń biri. Bul aýrýmen aýyrǵan naýqastardyń 35 paıyzy alǵashqy 2-3 táýlikte kóz jumady. Aman qalǵan adamdardyń densaýlyǵyna óte úlken zaqym keledi. Insýltke shaldyqqan adamǵa alǵashqy 3-4 saǵatta sapaly kómek kórsetilmese, jaǵdaıy qıyn bolady», - dedi professor Aleksandr Skoromets.
Aleksandr Skoromets Almatydaǵy nevrologııalyq qyzmettiń jumysyn óte joǵary baǵalady.
«Almaty sońǵy kezde búkil TMD kóleminde úlken nátıje kórsetip otyr. Qazaqstanda ınsýltqa qarsy qyzmettiń jumysy tamasha uıymdastyrylǵan. Sonymen qatar mıdyń maıda tamyrlarymen jumys jasaýǵa múmkindik beretin zamanaýı tehnologııalar bar», - dedi ol.
«Aleksandr Skoromets - belgili ǵalym. Kitaptaryn, monografııasyn Almaty dárigerleri birneshe jyldan beri oqyp júr. Bul kisiniń lektsııalary jas mamandarǵa óte tıimdi. Búgin tek konferentsııa ǵana emes, arnaıy master klass uıymdastyrylyp jatyr. 2018 jylǵa túrli salalar boıynsha iri konferentsııalar josparlap qoıdyq. Osyndaı oqytý emhanalarda jumys atqaratyn mamandarǵa óte paıdaly dep sanaımyn», - dedi aýrýhananyń bas dárigeri Marat Abdýllaev.
№7 aýrýhananyń bas dárigeriniń orynbasary Jadyra Sherııazdannyń aıtýynsha, Qazaqstanda ınsýlt aýrýyna shaldyǵý kórsetkishi 1000 adamǵa shaqqanda 2,5-3,5 adam ınsýlt aýrýyna shaldyǵady eken.
Al 1000 adamǵa shaqqanda 1,78 adam qaıtys bolady.
