Almaty dárigerleri er adamnyń kózinen 3 sm sym temir alyp shyqty
ALMATY. QazAqparat - Almatyda dárigerler er adamnyń kózinen 3 sm sym temir alyp shyqty, dep habarlaıdy QazAqparat tilshisi.
Qalalyq klınıkalyq ortalyq aýrýhananyń baspasóz qyzmetinen habarlaǵandaı, er adam jumysynda jaraqat alǵan.
Sym temir kóz almasyna kirip ketken.
Oftalmohırýrg, medıtsına ǵylymdarynyń magıstri Medet Altynbek shuǵyl túrde ota jasady. 1 saǵatqa sozylǵan otadan soń 3 sm spıral alyndy.
Ota nátıjesinde kóziniń aldyńǵy kamerasy men nurly qabyǵy qalpyna keltirildi. Kesilgen jara orny tigilip, kózdiń kórý qabileti qalpyna keldi.
«Osyndaı jaǵdaıda der kezinde kómek kórsetilmese, kózge keń kólemde qan jaıylýy múmkin. Adam kórý qabiletinen aıyrylady. Ota sátti ótti. Patsıent bólimshege aýystyryldy»,- dedi dáriger.
Aıta keteıik, qalalyq Ortalyq klınıkalyq aýrýhananyń oftalmologııalyq bólimshesinde jyl basynan beri 130 joǵary tehnologııalyq ota jasaldy.
