Almaty dárigerleri bazardaǵy saýdagerler men kelýshilerdi medıtsınalyq tekserýden ótkizdi
ALMATY. QazAqparat – Almatynyń Jetisý aýdanyndaǵy úsh bazarda medıtsına qyzmetkerleri 3 kún boıy adamdardy keshendi tekserýden ótkizdi, dep habarlaıdy QazAqparat tilshisi.
Almatylyq dárigerler «Baısat», «Sálem» jáne «Alataý-1» bazarlarynda jumys isteıtinder men kelýshilerge keshendi medıtsınalyq tekserýden ótýdi usyndy.
Medıtsınalyq profılaktıkalyq qabyldaýlarǵa Jetisý aýdanyndaǵy barlyq medıtsına mekemeleri qatysty. Olar flıýorografııa, holesterın men qandaǵy qant deńgeıin anyqtaý, kóz qysymyn ólsheý, qan qysymyn ólsheý jáne VICh-ınfektsııasyn anyqtaý úshin ekspress-testten ótý qyzmetterin usyndy.
«Adamdardyń turǵylyqty jerine qaramastan biz kelýshilerdiń barlyǵyn qabyldadyq. Bazarlarda jumys isteıtin kórshi memleketterdiń azamattary da dárigerlerden keńes alyp, medıtsınalyq tekserýden ótti. Tipti keıbireýleri ózderiniń qan qysymyn bilmegen, tekserý barysynda 21 adamnyń gıpertonııaǵa ushyraǵany anyqtaldy. Dárigerler shuǵyl túrde 9 adamnyń qan qysymyn retke keltirdi. Statsıonarly tsıfrlyq beket jumys istedi, sol arqyly adamdar qaı emhanaǵa tirkelgenderin bile aldy», - dedi Almaty qalalyq №111 emhananyń bólim meńgerýshisi Nazym Kúshikbaeva.
«Shetsiz qala» aktsııasy aıasynda jalpy praktıka dárigerleri 500 adamdy qabyldap, 37 adamnyń patologııasyn anyqtady.
