Almaty dárigerleri bas súıeginde týabitti aqaýy bar nárestege ota jasady

ALMATY. QazAqparat – Almatydaǵy №2 qalalyq klınıkalyq balalar aýrýhanasynda mı men bas súıeginiń aqaýymen týǵan sábılerge biregeı operatsııalar jasalady. Sondaı otanyń biri kranıosınostoz dıagnozy qoıylǵan 6 aılyq nárestege jasaldy, dep habarlaıdy QazAqparat tilshisi.

Emdeý mekemesiniń baspasóz qyzmetinen málim etkendeı, kúrdeli neırohırýrgııalyq operatsııa balalarǵa mindetti áleýmettik medıtsınalyq saqtandyrý esebinen tegin júrgiziledi.
Kúrdeli manıpýlıatsııany jasaýdy alǵash qolǵa alǵan neırohırýrg Azamat Jaıylǵanovtyń sózinshe, kranıosınostozǵa shaldyqqanda ishte jatqan sharananyń bas súıegi bitip, saldarynan súıek pishini buzylady.
Aıtýynsha, eńbegi erte qatyp, bas súıek pishini buzylǵan Demıd esimdi balaǵa kranıosınostoz dıagnozy 5 aıynda qoıylǵan.
«Ádette, balanyń bas súıegi únemi ózgerip otyrady. Súıek bólikteri bir-birine tigispen jalǵanǵan, bul onyń durys ósýine múmkindik beredi. Tabıǵatta sábıdiń eńbegi shamamen eki jasta jabylady. Al kranıosınostozǵa shaldyqqan balada erte jabylyp, bastyń jabylmaǵan tusy ósip, pishini buzylady», - deıdi dáriger.
Sonymen qatar ol der kezinde shara qoldanbasa mıǵa qysym kúsheıip, balanyń psıhıkalyq damýy tejelip, zaǵıptyq jáne basqa da birqatar nevrologııalyq aýrýǵa dýshar bolýy múmkin ekenin atap ótti.
«Demıdke shaǵyn ınvazıvti hırýrgııalyq operatsııa jasaldy. Bala otadan keıin tórtinshi kúni aýrýhanadan shyqty», - deıdi Azamat Jaıylǵanov.
Ákesiniń aıtýynsha, hırýrgııalyq emniń nátıjesi birden kórine bastaǵan. Bastapqyda dıagnoz qoıylǵannan keıin sary ýaıymǵa salynǵan ata-ana perzentin shetelge aparyp emdetý jaǵyn oılastyrypty.
«Qazir Demıdtiń jaǵdaıy jaqsy. Munyń bári qazaqstandyq balalar neırohırýrgteriniń, qoly altyn dáriger Azamat Ábikenulynyń arqasy», - deıdi sábıdiń ákesi.