Almaty dárigerleri aýyr dıagnozben bosanǵan áıeldi aman alyp qaldy
ALMATY. QazAqparat – Almatydaǵy perınatologııa jáne balalar kardıohırýrgııasy ortalyǵynyń dárigerleri aýyr dıagnozy bar áıeldiń ómiri úshin 20 kún kúresti, dep habarlaıdy QazAqparat tilshisi.
Perınatologııa jáne balalar kardıohırýrgııasy ortalyǵyna júktiliktiń 36 aptasynda HELLP sındromymen, jedel baýyr jetkiliksizdigimen jáne astsıtpen (ish qýysynda suıyqtyqtyń jınalýy) asqynǵan aýyr preeklampsııa dıagnozymen 26 jastaǵy áıel aýyr jaǵdaıda tústi.
Dárigerlerdiń aıtýynsha, uryq membranalarynyń prenataldy jarylýyna baılanysty júkti áıeldiń jaǵdaıy nasharlaǵan. Naýqasty shuǵyl túrde bosandyrýǵa týra keldi. Dúnıege salmaǵy 2,9 keli deni saý ul keldi. Jansaqtaý bóliminde dárigerler 20 kúnnen astam ýaqyt boıy anasynyń ómiri úshin kúresti.
«Aýrýhananyń barlyq dárigerleri men medbıkeleri úılesimdi jáne naqty jumys istedi, bizdiń dárigerlerdiń kásibıliginiń arqasynda ólim-jitimniń aldy alyndy», - deıdi perınatologııa jáne balalar kardıohırýrgııasy ortalyǵynyń dırektory Ǵanı Bodyqov.
Onyń aıtýynsha, HELLP sındromymen asqynǵan aýyr preeklampsııa - qolaısyz perınataldy nátıjelerdiń joǵary qaýip faktory. Mundaı dıagnoz ananyń da, uryqtyń da densaýlyǵyna keri áser etedi jáne óte aýyr zardaptarǵa ákelýi múmkin, atap aıtqanda 80% ananyń ólimine jáne uryqtyń ólimine ákeledi.
Qýanyshymyzǵa oraı, bul jaǵdaıda balanyń ómirine qaýip tónbedi. Biraq anasynyń jaǵdaıy óte aýyr boldy.
Dárigerlerdiń arqasynda naýqastyń beti beri qarady. Búgingi kúni ana men bala ózin jaqsy sezinedi jáne úıine shyǵaryldy.
