Almaty dárigerleri aýyr dertke shaldyqqan 20 jastaǵy boıjetkendi aman alyp qaldy
ALMATY. QazAqparat - Almaty dárigerleri asa qaýipti baýyr dertine shaldyqqan 20 jastaǵy boıjetkendi ajal aýzynan arashalap qaldy, dep habarlaıdy QazAqparat tilshisi.
Tuńǵysh ret Qazaqstandyq dárigerler ótkir fýlmınantty baýyr jetkiliksizdigimen aýyratyn adamnyń baýyryn aýystyrdy. Biregeı otany 21-aqpanda A.N.Syzǵanov atyndaǵy Ulttyq hırýrgııa ortalyǵynyń transplantologtar brıgadasy jasady. Álemde osyndaı otalardan soń patsıentterdiń 70 paıyzy kóz jumady eken. Aıda esimdi boıjetken osydan 2 aı buryn aýyryp aýrýhanaǵa túsken. Dárigerler oǵan gepatıt degen dıagnoz qoıǵan. 
Qan taldaýynda bılırýbınniń kóterilgeni, gıpokoagýlıatsııa, glıkemııa baıqalǵan. Júrgizilgen emnen soń patsıenttiń jaǵdaıy odan ári nasharlaı túsken. Birneshe ret jınalǵan konsılıým barysynda dárigerler eń sońǵy jol - baýyr aýystyrýǵa kirisken. 21-aqpanda A.N.Syzǵanov atyndaǵy Ulttyq hırýrgııa ortalyǵynyń dárigerler brıgadasy ota jasady. Aıdaǵa baýyrynyń bir bólshegin nemere aǵasy Mereı berýge kelisti.
«Mundaı ota Qazaqstanda tuńǵysh ret jasaldy. Sonymen qatar sátti ótti. Ýaqytynda jasalǵan otanyń arqasynda Aıda da, Mereı de uzaq ómir súre alatyn boldy», - dedi professor Bolatbek Baımahanov. 
Professordyń aıtýynsha, baýyr transplantatsııasy ish qurylysyndaǵy eń kúrdeli ota bolyp tabylady. Baýyrdyń fýlmınantty jetispeýshiligi dárilik zattar men toksındermen ýlanǵan kezde paıda bolýy múmkin. Álemde 100 000 adamǵa shaqqanda 19 jaǵdaıda osyndaı dıagnoz qoıylady.
