Almaty dárigerleri 14 antıbıotıkten kóz jumǵan patsıent týraly aıtty
ALMATY. QazAqparat - Búgin Almatyda Medeý aýdandyq №1 emhanada dárigerler mamannyń retseptinsiz antıbıotık qabyldaýdyń arty nege soǵatynyn túsindirdi, dep habarlaıdy QazAqparat tilshisi.
№1 emhananyń bas dárigeri Sapar Rahmensheev antıbıotıktiń adam aǵzasyna paıdasymen qatar zııany da jeterlik ekenin atap ótti.
«Adam óz betinshe emdelmeýi kerek. Qarapaıym adamdar antıbıotıkterdiń zııany men keri áserlerin bile bermeıdi», - dedi Sapar Rahmensheev.
S.Asfendııarov atyndaǵy QazUMÝ balalar juqpaly aýrýlary kafedrasynyń meńgerýshisi, professor Ádil Qatarbaev antıbıotıkti beı-berekte qabyldaýdyń sońy jaqsylyqqa ákelmeıtinin aıtty.
«Bizde sondaı jaǵdaı boldy. Ókpesi qabynǵan adam 2 aıda 14 túrli antıbıotık qabyldaǵan. Sonyń kesirinen ol adam kóz jumdy. Antıbıotık - farmatsevtıkalyq bıznestiń bir kózi. Dárihanalarda tolyp tur. Іzdegen adam ınternetten qaraı salady. Al kóp adam onyń keri áserin bilmeıdi. Antıbıotık terapııasy ár adamnyń jeke basynyń ereksheligine qaraı júrgizilýi kerek. Dárigerdiń bergen dozasyn ózgertýge bolmaıdy», - dedi Qatarbaev.
Sonymen qatar professor jón-josyqsyz antıbıotık jaza beretin dárigerler arnaıy biliktiligin arttyrý kýrstaryna jazylýy kerektigin aıtty.
Onyń aıtýynsha, antıbıotık jazýǵa eń bastysy arnaıy taldaý, eń az degende qan taldaýy bolýy kerek.
