Almaty dárigerleri 1 mlrd teńgeden astam ústemeaqy aldy
ALMATY. QazAqparat – Almatyda koronavırýspen kúresip jatqan medıtsına qyzmetkerlerine 1 mlrd 134 mln teńge kóleminde ústemeaqy berildi. Bul týraly onlaın brıfıng barysynda qalalyq Qoǵamdyq densaýlyq saqtaý basqarmasynyń basshysy Tileýhan Ábildaev aıtty, dep habarlaıdy QazAqparat tilshisi.
Basqarma basshysy dárigerler ústemeaqy almady degen aqparatty joqqa shyǵardy.
«Keshe keıbir BAQ betterinde COVID-19 koronavırýsymen kúres aıasynda epıdemııaǵa qarsy is-sharalarǵa tartylǵan medıtsına qyzmetkerlerine ústemeaqy tólemenbegendigi týraly aqparattar jarııalandy. Atalǵan fakt boıynsha Memlekettik komıssııasynyń táýekel sanattary tizimine kiretin barlyq medıtsına qyzmetkerleri jumys istegen saǵattar úshin tolyq kólemde tólemder alatyndyǵyn resmı túrde habarlaımyn. Memlekettik komıssııanyń sheshimine sáıkes, Memleket basshysynyń tapsyrmasy boıynsha kómek alýǵa úsh táýekel tobyna jatqyzylǵan medıtsına qyzmetkerleri quqyly ekenin eske salamyz», - dedi basqarma basshysy.
Tileýhan Ábildaev Balalar qalalyq juqpaly aýrýlar aýrýhanasy men Medıtsınalyq jedel járdem qyzmetinde oryn alǵan áleýmettik shıeleniske baılanysty bul buıryqtyń negizgi erejeleri týraly, jalaqyǵa qosymsha beriletin ústemeaqy kimge tıesili jóninde jáne qyzmetkerler sanaty týraly ózi jeke túsindirý jumystaryn júrgizgen.
«Osy buıryqtyń táýekel tobyna kirmegen qyzmetkerlerge qatysty, olar boıynsha medıtsınalyq uıymdardyń jalaqy qorynan qarjylaı qoldaý týraly sheshim qabyldanyp jatyr. Bul materıaldyq qoldaý medıtsına qyzmetkerleriniń kúshin yntalandyrý jáne qoldaý úshin mańyzdy. Sondaı-aq, tólemder QR Salyq kodeksine sáıkes barlyq salyqtardy eskere otyryp, aılyq jumys balansynan aspaıtyn naqty jumys istegen ýaqyty úshin júrgiziletindigin eske salǵym keledi», - dedi ol.
Qazir Almatyda 3 758 qyzmetkerge, onyń ishinde 498 dárigerge, 1800 orta medıtsına qyzmetkerine, 624 kishi medıtsına qyzmetkerine jáne basqa da 836 qyzmetkerge, onyń ishinde medıtsınalyq jedel járdem qyzmetiniń 822 júrgizýshisine tólem júrgizildi.
Olarǵa jalpy alǵanda 1 mlrd 134,8 mln teńge tólengen.
Búgin Medıtsınalyq jedel járdem qyzmetiniń jumyskerlerine tólem júrgizilip jatyr. Osylaısha 100%-ǵa deıin jetkiziletin bolady.
Aıta ketý kerek, Almatyda koronavırýs juqtyrǵan medıtsına qyzmetkerleriniń sany 234-ke jetti.
