Almaty dərigerleri əıelderdiń sút bezi obyrynan tekserilýge salǵyrttyǵyn aıtty
ALMATY. QazAqparat - Almatyda tekserilgen áıelderdiń 39 %-ynan sút bezi qaterli isigi aldyndaǵy aýrýdyń belgileri anyqtaldy, dep habarlaıdy QazAqparat tilshisi qalalyq №11 emhananyń baspasóz qyzmetine silteme jasap.
Almatyda 1 qarashaǵa deıin áıelderdiń sút bezin tekserý boıynsha skrınıngtik baqylaý men profılaktıkalyq tekserý sharalary jalǵasatyn bolady.
Mamandardyń aıtýynsha, áıel qaýymy arasynda sút bezi qaterli isigi barlyq kórsetkishter boıynsha alda tur.
«Jyl basynan beri 1544 áıel skrınıngtik tekserýden ótken. Onyń ishinde 600 áıelde sút beziniń qaterli isik aldyndaǵy belgileri anyqtalǵan. Bul barlyq qaralǵandardyń shamamen 39 paıyzyn quraıdy. 4 áıeldiń sút bezi qaterli isigine shaldyqqany rastaldy. Bul kelinshekter qazir mammolog mamandardyń emin qabyldap jatyr. Qazir olardyń jaǵdaıy birqalypty. Mundaı kórsetkishter áıelderdiń densaýlyǵyn jıi tekserip turý qajettigin kórsetedi», - dedi №11 qalalyq emhananyń profılaktıka bóliminiń meńgerýshisi Jıǵagúl Sultanova.
Aıta ketý kerek, profılaktıkalyq tekserý 2011 jyldan bastap tirkeý orny boıynsha tegin ótkiziledi.
«Bul tekserilýge 52, 54, 56, 58 jáne 60 jastaǵy áıelder kelýge mindetti. Sút beziniń mammografııasy jasalady.
Ózgerister anyqtalǵan jaǵdaıda mammolog tekseredi. Biz tirkeýdegi áıelderge qońyraý shalamyz, shaqyramyz. Alaıda áıelderdiń belsendiligi tómen», - dedi emhanadan.
