Almaty tsırkine bomba «qoıǵan» er adam ustaldy
ALMATY. QazAqparat - Almatyda jarylǵysh zat týraly jalǵan habarlama bergen er adam ustaldy, dep habarlaıdy QazAqparat tilshisi.
Búgin, saǵat 11:35-te «102» nomerine Abaı kóshesinde ornalasqan saýda, oıyn-saýyq ortalyǵynyń birine jáne Almaty tsırki ǵımaratyna jarylǵysh zattar ornatylǵany týraly qońyraý túsken.
Atalǵan nysandarǵa polıtsııanyń keshendi kúshteriniń patrýldik jasaǵy, arnaıy bólimshelerdiń saperlary jáne qalanyń ózge de shuǵyl qyzmetteri dereý jetken.
«Ǵımarattardy tekserý kezinde jarylǵysh zattar tabylmady. Jedel operatsııa barysynda 54 jastaǵy er adam ustaldy. Ol mas kúıinde saýda, oıyn-saýyq ortalyǵynyń ájethanasynda tyǵylyp turǵan jerinen tabyldy. Anonımdi qońyraý shalýǵa ne túrtki bolǵanyn túsindire almady», - dedi Bostandyq aýdany Polıtsııa basqarmasynyń basshysy Dáýren Ótebaev.
Kúdikti Almaty qalalyq Narkologııa ortalyǵyna jetkizildi. Fakti boıynsha QR QK 273-babymen sotqa deıingi tergeý amaldary júrgizilýde. Ol 5 jylǵa deıin bas bostandyǵynan aıyrylýy múmkin.
