Almaty tsırkinde jańajyldyq «Qar hanshaıymy» ertegisi kórsetile bastady

«Qar hanshaıymy» qoıylymy Danııa eliniń ataqty jazýshysy Hans Krıstıan Andersen jazǵan erteginiń jelisimen usynylǵan.

Erteginiń sıýjeti boıynsha qara kúshter jaqsylyqqa qarsy turady, tek shynaıy dostyq qana zulymdyqty jeńedi.

Bul shoýda áýe gımnastary tańqalarlyq óner kórsetedi. Olardyń eń jasy - jetide. Onyń atasy - QR eńbek sińirgen qaıratker

Qurmanǵalı Dosbatyrov tsırkte 50 jyl jumys istegen. Qazir ol áýe akrobatıkalyq janrdaǵy ártisterdi daıyndaıdy.

«Nemerem 4 jasynan bastap aınalysady. Onyń ákesi de tsırkte jumys isteıdi. Bul - Danattyń qoıylymǵa ekinshi ret qatysýy. Nemerem sondaı-aq sporttyq gımnastıkamen de aınalysady», - deıdi Q.Dosbatyrov.

Erteginiń eń jas qatysýshysy Danat Dosbatyrov Qar hanshaıymy sıqyrlaǵysy keletin Kaı esimdi balanyń rólin oınaıdy.

«Qoıylymǵa ákem jáne atammen birge daıyndaldym. Bolashaqta tsırk ártisi, atap aıtqanda gımnast bolǵym keledi», - deıdi jas ártis.

Jańajyldyq ertegidegi Qar hanshaıymynyń rólin Búkilreseılik «Tsırk hanshaıymy» festıvaliniń qola tájiniń ıegeri, Monte-Karloda ótken IX «Jańa urpaq» halyqaralyq tsırk óneri festıvaliniń kúmis júldegeri Anastasııa Demıdova oınady.

«Búgin bizdiń qoıylymda óte jas ártister bar. Bilesiz be, maǵan balalarmen jumys isteý óte qyzyq. Olar shynaıy ýaıymdap, tabıǵı emotsııalaryn kórsetedi. Bul degen tamasha»,- deıdi tsırk ártisi.

Aıtý kerek, arnaıy baǵdarlama úshin jarqyn sıýjetke baı erekshe stsenarıı jazyldy. Jańa kostıýmder tigilip, erekshe rekvızıtter jasaldy.

Jańa baǵdarlama arqyly rejısserlik-qoıylymdyq top kóńil kóterýden bólek, bilim jáne tárbıe berý mindetterin de qoıdy.

Sondaı-aq, tsırktiń kishkentaı kórermenderi endigi kezekte áıgili ertegimen tsırk qoıylymy arqyly tanysa alady.

Almatylyq kórermen úshin jańajyldyq baǵdarlama 18 jeltoqsannan 2022 jyldyń 9 qańtaryna deıin usynylady.

Spektakldiń uzaqtyǵy úzilispen birge 2 saǵatqa sozylady.