Almaty tsırki gastroldik saparmen elimizdi aralamaq
ASTANA. QazAqparat - Osydan 237 jyl buryn álemdegi alǵashqy tsırk Londonda paıda bolǵan. Al Almaty tsırkiniń tarıhy nebári qyryq jyldan asyp jyǵylady. Osy ýaqyt ishinde ol kóptiń kóńilinen shyǵyp úlgergen.
Qazir onyń ártisteri ónersúıer qaýymǵa arnap «Altyn kaleıdoskop» atty jańa baǵdarlama daıyndap jatyr.
Andreı Kanahınniń ónerine tamsanbaıtyn jan bolmas. Ol on eki metrlik bıiktikte «ajalmen arpalysyp», «ólim shyńyn» baǵyndyrady. Muńdaıdy bizdiń elde áli eshkim jasamapty. Al Andreı Qytaıdan úırenip kelgen.
«Bizde bul qorqynysh emes, kýraj dep ataldy. Qorqynysh barlyǵyn qurtady, ónerimiz sátsiz bolady. Bul erlik sekildi nárse goı. Biraq múlde qoryqpaýǵa da bolmaıdy. Ár nómir saıyn janymyzdy shúberekke túıip, táýekelge bel býamyz», - deıdi tsırk ártisi Andreı Kanahın. Órimdeı qyz Marına Starodýbova jastyǵyna qaramaı 9 jasynda-aq tsırk qyzmetkeri, tipti aılyq alady. Ol tsırkke tórt jasynda kelipti. Sol jyly «Azııa jańǵyryǵy» halyqaralyq festıvaliniń bas júldesin jeńip alǵan. «Munda ártis bolý úshin ıkemdilik pen qaısarlyq qajet», deıdi ol. «Ázirge balam joq, Alla jazsa, birneshe kúnnen soń dúnıege kelýi tıis. Bolashaqta ol da bizdiń jolymyzdy qýady dep úmittenemin»,- dedi «Qazaq memlekettik tsırki» MQM dırektory Dáýlet Dosbatyrov. Tsırkte óner kórsetýden bólek, Dáýlet Dosbatyrov burynǵy Keńes keńistigindegi birden bir doktor ataǵy bar tsırk basshysy. Jas basshynyń jospary - tsırkke kúrdeli jóńdeý júrgizý, zamanaýı jabdyqpen qamtamasyz etý. Sondaı-aq almatylyq tsırk óz shapıtosyn ashyp, gastroldik saparmen elimizdiń qalalaryn aralamaq, dep habarlaıdy Jetinshi arna.
