Almaty bıýdjetiniń ashyqtyǵy máselesi talqylandy

ALMATY. QazAqparat -Almatyda ákimi Baqytjan Saǵyntaevtyń tóraǵalyǵymen Sybaılas jemqorlyqqa qarsy is-qımyl máseleleri boıynsha jıyn ótti, dep habarlaıdy QazAqparat tilshisi.

Keńeske Almaty qalasynyń Sybaılas jemqorlyqqa qarsy qyzmetiniń basshysy Nyǵmedjan Saparov jáne jergilikti atqarýshy organdardyń basshylary qatysty.

Vedomstvo basshysy qol astyndaǵy basshylar arasynda sybaılas jemqorlyqqa qarsy kúres jaýapkershiligin arttyrý týraly baıandama jasady.

Keńes barysynda, sondaı-aq, memlekettik organdardyń ashyqtyǵy men eseptiligi, ashyq bıýdjettiń publicbudget.kz ınteraktıvti kartasyn iske asyrý máseleleri, memlekettik satyp alý kezinde baǵany kóterý derekterin anyqtap, bıýdjet qarajatyn maqsatsyz paıdalanýdy jáne «Biryńǵaı satyp alý terezesi» aqparattyq-taldaý júıesi arqyly jymqyrý boldyrmaý týraly aıtyldy.

Keńes qorytyndysy boıynsha qala ákimi Baqytjan Saǵyntaev barlyq memlekettik organdardyń basshylaryna sybaılas jemqorlyqqa qarsy is-qımyl zańnamasyn qatań saqtaýdy eskertti jáne birqatar naqty tapsyrmalar berdi.

Memlekettik organdardyń basshylaryna qyzmettiń ashyqtyǵy men aıqyndylyǵyn arttyrý, ınteraktıvti kartany odan ári iske asyrý boıynsha baqylaý júrgizý, memlekettik satyp alýdy ótkizý boıynsha jumysty jandandyrý, sondaı-aq, sybaılas jemqorlyqqa qarsy is-qımyl boıynsha keshendi sharalar ázirleý usynyldy.