Almaty bıýdjetinen medqyzmetkerlerdiń biliktiligin arttyrýǵa 60% qarjy bólindi
ALMATY. QazAqparat - Almatyda jergilikti bıýdjetten medıtsına qyzmetkerleriniń biliktiligin arttyrýǵa 60% -dan astam qarjy bólindi. Bul týraly Almaty qalasynyń óńirlik kommýnıkatsııalar qyzmeti alańynda ótken onlaın-suhbat barysynda Joǵary medıtsınalyq kolledjdiń dırektory Svetlana Sultanǵazıeva aıtyp berdi, dep habarlaıdy QazAqparat tilshisi.
Joǵary medıtsınalyq kolledj Almaty qalasynyń praktıkalyq densaýlyq saqtaý mamandaryn dıplomnan keıingi daıarlaýmen aınalysady. Kolledj quramynda densaýlyq saqtaý salasynda qosymsha bilim berý baǵdarlamalaryn iske asyratyn oqý-ádistemelik ortalyq bar.
Medıtsına mamandarynyń biliktiligin arttyrý 3 túrli jolmen júzege asady:
- beıini boıynsha jetekshi otandyq mamandardy tarta otyryp, el ishinde medıtsına kadrlarynyń biliktiligin arttyrýdy uıymdastyrý;
- Almaty qalasyna sheteldik jetekshi mamandardy tartý jáne semınar-trenıngter (master-klastar) ótkizý arqyly medıtsına kadrlarynyń biliktiligin arttyrýdy uıymdastyrý);
- sheteldik bilim berý uıymdaryna nemese klınıkalyq ortalyqtarǵa jiberý arqyly mamandardyń biliktiligin arttyrýdy uıymdastyrý.
Oqý ádistemelik ortalyǵynda sımýlıatsııalyq ortalyq (17 maneken men fantom, onyń 4-ýi kompıýterlendirilgen), ana men balany qorǵaý ortalyǵy jáne qosymsha bilim berý bólimi jumys isteıdi.
Oqytý ana men balany qorǵaý, qabyldaý bólimshesiniń jumysyn uıymdastyrý, shuǵyl medıtsınalyq kómek kórsetý (halyqaralyq standarttar: BLS, ACLS, PALS, PHTLS), Epıdemıologııa, klınıka boıynsha júredi.
Endi bul baǵyttarǵa COVID-19 profılaktıkasy, COVID-19-ǵa kúdikti naýqastarmen qaýipsiz jumys salasy qosylyp jatyr.
«Bıyl KVI (Koronavırýstyq ınfektsııanyń) dıagnostıkasy jáne emdeý, jańa ınfektsııalyq klınıkalarda jumys isteý úshin medıtsına qyzmetkerlerin daıarlaý boıynsha taqyryptar basym boldy. Osy ózekti taqyrypqa sheteldik (Izraıl, Germanııa, Reseı, Ispanııa, Anglııa, Koreıa jáne t.b.) jáne otandyq mamandardy tarta otyryp, biliktilikti arttyrýdyń 40-tan astam tsıkly ótkizildi. KVI (Koronavırýstyq ınfektsııanyń) taqyryby boıynsha tájirıbelik densaýlyq saqtaýdyń 3 myńnan astam qyzmetkeri oqytyldy. Basqa tsıkldarda 4,5 myńǵa jýyq maman oqytyldy», - dedi spıker.
Svetlana Sultanǵazıvanyń aıtýynsha, jyldan jylǵa dárigerler men orta medıtsına qyzmetkerlerin dıplomnan keıingi daıarlaýǵa jergilikti bıýdjetten qarjylandyrý ósip kele jatyr.
Ótken jyldarmen salystyrǵanda 2020 jyly Almaty qalasynyń medıtsına qyzmetkerleriniń biliktiligin arttyrýǵa jergilikti bıýdjetten 60%-dan astam qarjy bólindi.
«2020-2021 oqý jyldarynda bizdiń kolledjde oqý úshin 325 grant bólindi, al aldyńǵy jyldary grant sany 225-ten aspaǵan. Munyń bári Almaty qalasy ákimdiginiń jergilikti atqarýshy organynyń tájirıbelik densaýlyq saqtaý problemalaryna jiti nazar aýdaratynyn bildiredi», - dep tolyqtyrdy ol.
