Almaty botanıkalyq baǵynda qustardyń 300-ge jýyq túri bar
ALMATY. QazAqparat - Almatydaǵy botanıkalyq baqtyń aýmaǵynda qustyń 300-ge jýyq túri mekendeıdi. Bul týraly baqtyń áleýmettik jelidegi paraqshasynda jazyldy, dep habarlaıdy QazAqparat tilshisi.
Botanıkalyq baqtyń málimetinshe, baq aýmaǵynda qustardyń 300-ge jýyq túri mekendeıdi. Munda úki, qyrǵaýyl, úırek, jolaq, kógershin jáne shoqpar sekildi qustardyń túrlerin kezdestirýge bolady. Sondaı-aq, baq ujymy búgin, ıaǵnı, 1 sáýir - Halyqaralyq qustar kúni ekenin málimdedi.
«Bul ekologııalyq merekeniń maqsaty – qustardyń máselelerine nazar aýdara otyryp, jer sharyndaǵy qustardyń túr alýandyǵy men kóptigin saqtaý. Qustar bizge tanys barlyq ekojúıelerdiń mańyzdy qatysýshylary bolyp tabylady, olardyń joıylýy naǵyz tabıǵı apatqa ákelýi múmkin. Qustar - tuqymnyń taralýyna yqpal etedi, omyrtqasyzdardyń (qurttar, mollıýskalar, jándikter) jáne omyrtqalylardyń (qosmekendiler, kemirgishter) sanyn retteıdi. Qustar tyshqan tárizdi kemirgishterdi, jándikterdi, orman jáne aýyl sharýashylyǵyna zııandy aramshóp tuqymdaryn joıady. Olar pestıtsıdterdi qoldanýdy aıtarlyqtaı azaıtýǵa kómektesedi. Biz qustardyń aǵashtar men ósimdikterdegi zııandy jándikterdi joıý arqyly ákeletin paıdasyn baǵalaımyz», - dep jazady baq ujymy.
Almatylyqtar botanıkalyq baqqa kómek retinde eki jyldan beri qus uıalaryn ákelip berýde eken.
«Qustardyń sanyn kóbeıtý úshin qysta uıalary men jemshópterin ilip, tamaqtandyramyz. Eki jyldan beri qamqor almatylyqtar bizdiń kómekke shaqyrýymyzǵa ún qosyp, botanıkalyq baqqa qus uıalaryn ákelip jatyr, bul úshin alǵysymyz sheksiz. Qustar kóktemde uıalarǵa qonystanyp, balapandaryn shyǵarýy úshin baqshanyń ońasha buryshtaryna qus uıalary ilinip qoıylady. Qanatty dostarymyzǵa qamqor bolyp, olardy qorǵaıyq», - dep jazdy botanıkalyq ujymy jelige.
Eske salaıyq, Almatydaǵy botanıkalyq baqqa aqqýlardyń oralǵany týraly jazǵan edik.
