Almaty «bomba» úshin qonaqúıden adamdar evakýatsııalandy

ALMATY. QazAqparat – Almatydaǵy qonaqúılerdiń birinde qyzmetkerler men kelýshiler jarylǵysh zat qoıylǵany týraly málimetke baılanysty evakýatsııalandy, dep habarlaıdy QazAqparat tilshisi.

Almaty qalalyq Polıtsııa departamentiniń deregine sáıkes, 3 qyrkúıek, túngi saǵat 23:51-de Bostandyq aýdanynda ornalasqan qonaqúılerdiń birine jarylǵysh zat qoıylǵany týraly habarlama túsken.

Atalǵan nysanǵa qalanyń jedel qyzmetteri shuǵyl jiberilgen. Qonaqúıdiń qyzmetkerleri men kelýshileri evakýatsııalandy. Saper bólimshesi kópqabatty ǵımaratty eki saǵattan artyq tintidi.

«Tekseris nátıjesinde jarylǵysh zat tabylǵan joq. Qazirgi ýaqytta anonımdi habar bergen adamdy anyqtaý, ony ustaý jáne ary qaraı jaýapqa tartý baǵytynda keshendi jedel sharalar júrip jatyr», - dep habarlady Polıtsııa departamentiniń baspasóz qyzmetinen.