Almaty blokpostyndaǵy apat: Eks-polıtseı jumysynan qashan bosatylǵanyn esine túsire almady
ALMATY. QazAqparat - Almaty mańyndaǵy blokposty qıratyp, eki polıtseıdiń ólimine sebepshi bolǵan burynǵy polıtsııa qyzmetkeri quqyq qorǵaý organdarynan qashan bosatylǵanyn esine túsire almady, dep habarlaıdy QazAqparat tilshisi.
Sot barysynda jábirlenýshi taraptyń advokaty aıyptalýshydan: «Sizdi 21 mamyrda jumystan shyǵardy. Jumystan bosatý týraly buıryqty qaı kúni aldyńyz?», - dep surady.
«Esimde joq», - dep jaýap berdi sottalýshy Azat Azamatov.
Advokattyń aıtýynsha, quqyq qorǵaý organdary týraly zańǵa sáıkes, óz erkimen jumystan bosatý týraly ótinish berilgen sátten bastap bir aı ishinde qaralady. Sol sebepti jol-kólik oqıǵasy kezinde Azamatov ishki ister organdarynda jumys istep júrgen degen boljam jasaldy.
«Jol apaty kezinde, Siz polıtsııa qyzmetkeri boldyńyz ba?»,– dep qorǵaýshy taǵy surady.
«Men bul suraqqa jaýap bermeımin», – dedi sottalýshy.
«Mártebeli sýdıa, bul mańyzdy dep sanaımyn jáne talap etýge bizdiń quqyǵymyz bar. Sotta Azamatov 20 mamyrda jumystan ketý týraly aryz jazǵanyn aıtty. Quqyq qorǵaý organdary týraly zańǵa sáıkes, bul ótinish bir aı ishinde qaralýy kerek», - dep qaıtalady advokat.
Sonymen qatar, ol kelesi sot otyrysyna jumystan bosatý týraly buıryqtyń kóshirmesi men býhgalterııadan esep aıyrysý týraly túbirtekti usynýlaryn surady.
Aıta keteıik, Polıtsııa departamenti Azat Azamatov ishki ister organdarynda 2014 jyldyń 30 sáýirinen 2020 jyldyń 21 mamyryna deıin Patrýldik polıtsııa ınspektory bolyp jumys istegenin habarlaǵan bolatyn.
Buǵan deıin, jol apatynan aman qalǵan polıtseı oqıǵanyń qalaı bolǵanyn aıtyp bergen edi.
Azat Azamatov óz kinásin tolyq moıyndaǵan bolatyn.
Qaza bolǵan polıtseı Dastan Ábdiqanovtyń áıeli Dınara Aman apatqa kináli adamnan moraldyq zııan retinde 37 mln teńge ótemaqy talap etti.
