Almaty blokpostynda qaza tapqan polıtseılerge qandaı kómek kórsetiledi
NUR-SULTAN. QazAqparat - QR Іshki ister mınıstri Erlan Turǵymbaev Almaty blokpostynda qaza tapqan polıtsııa qyzmetkerleriniń otbasyna qandaı kómek kórsetiletinin aıtty, dep habarlaıdy QazAqparat tilshisi.
«Qyzmettik mindetin óteý barysynda qaza tapqan polıtsııa qyzmetkerlerine memleket tarapynan jerleý shyǵyndary óteledi. Ol 400-den 500 myń teńgege deıingi mólsherde bolady. Sonymen qatar qaza tabýyna baılanysty birretik ótemaqy beriledi. Janǵazıevke shamamen 10 mln, Ábdiqanovqa 7,5 mln teńge beriledi. Bizdiń qyzmetkerlerimizdiń barlyǵy saqtandyrylǵan. Sondyqtan áleýmettik qorǵaý organdary tarapynan Memlekettik áleýmettik saqtandyrý qorynan asyraýshysynan aıyrylýyna baılanysty onyń balalaryn asyraýǵa tólem qarastyrylǵan», - dedi Erlan Turǵymbaev Ortalyq kommýnıkatsııalar qyzmetinde ótken brıfıngide BAQ ókilderiniń saýalyna oraı.
Mınıstr búkil elimizdi dúr silkintken osy oqıǵaǵa baılanysty Almatyǵa baryp, qaza tapqan eki qyzmetkerdiń otbasylaryna kóńil aıtqanyn atap ótti.
«Óıtkeni olar bizdiń úzdik qyzmetkerlerimiz edi. Qyzmettik mindetterin oryndaý barysynda qaza tapty. Olar 78 táýlik boıy kúni-túni atalǵan blokpostarda, is júzinde otbasynan shalǵaıda júrdi. Sonymen qatar qyzmettik paryzdaryn sońyna deıin atqardy. Olar Memleket basshysynyń Jarlyǵymen memlekettik nagradalarmen marapattaldy. Sonymen qatar qazirgi ýaqytta Almaty ákimdigi tarapynan olardyń otbasyna baspana bólý máselesi qarastyrylyp jatyr. Janǵazıevtiń artynda áıeli men eki balasy qaldy. Jubaıy dáriger, ol da osy kúnderi aýrýhanada jumys istedi. Taıaýda shańyraq kótergen Ábdiqanovtyń balasynyń dúnıege kelgenine bir ǵana aı boldy. Ol da jas otbasy, ata-anasymen birge turyp kelgen. Ekeýiniń de jekemenshik baspanalary bolmaǵan. Sondyqtan ákimdikke ótinish jasadym. Qala ákimi sheshim qabyldady. Taıaý ýaqytta baspana máselesi sheshiledi dep oılaımyn», - dedi Erlan Turǵymbaev.
Sonymen qatar mınıstr osy oqıǵa kezinde jaraqat alyp, birneshe kún boıy aýrýhananyń jansaqtaý bóliminde jatqan úshinshi qyzmetkerdiń ómiri úshin arpalysyp júrgen dárigerlerge rızashylyǵyn bildirdi.
«Ony jansaqtaý bóliminen jalpy palataǵa aýystyrdy. Densaýlyǵyna esh qaýip tónip turǵan joq», - dedi ol.
