Almaty-Bishkek jolynda apatqa ushyraǵan jolaýshylar úıilerine qaıtaryldy
ALMATY. QazAqparat - Almaty-Bishkek tasjolyndaǵy apattan aman qalǵan jolaýshylardyń barlyǵy emdelip úılerine qaıtaryldy. Bul týraly QazAqparat tilshisine Jambyl aýdandyq Ortalyq aýrýhanasynyń bas dárigeriniń orynbasary Botagóz Medetbekova aıtty.
«Sol kúni túsken jolaýshylardyń barlyǵy tolyq em qabyldap, úılerine qaıtaryldy. Jansaqtaý bóliminde jatqan Gúlsapar Alfeeva da 10 kúnnen soń úıine qaıtty. Ol omyrtqasy zaqymdanyp, jumsaq tinderi, keýde qýysy soqqy alyp túsken bolatyn. Bir patsıenttiń balasy Qaskeleńde bolatyn. Sol sebepti ol kisi Qaskeleń aýrýhanasyna aýysty. Bir patsıent óz qalaýymen Almatydaǵy №7 aýrýhanaǵa aýysty», - dedi Botagóz Medetbekova.
Aıta ketý kerek, jol-kólik apaty Almaty oblysyndaǵy Uzynaǵash kentiniń mańynda bolǵan. 43 jolaýshysy bar avtobýs Shymkentten Almatyǵa qaraı ketip bara jatqan. Bastapqy boljam boıynsha 41 jastaǵy avtobýs júrgizýshisi taıǵaq jolda kólik tizginine ıe bola almaı qalǵan.
Atalǵan fakti boıynsha QR QK 345-baby 4-shi bóligine sáıkes is qozǵalyp, tergeý jumystary jalǵasýda. Negizinen jol apatynda OQO, Almaty turǵyndary, Ózbekstan, Qaraqalpaqstan azamattary zardap shekken.
Jol apaty bolǵan jerden 28 adam Jambyl aýdandyq ortalyq aýrýhanasyna jetkizilip, 2 adam oqıǵa ornynda kóz jumǵan bolatyn.
22 jastaǵy jigit jansaqtaý bóliminde kóz jumdy. Taǵy bir áıel jansaqtaý bólimine tústi.
17 adam ambýlatorııalyq em qabyldaýǵa úıine qaıtarylǵan. Olarǵa oblystan kelgen bilikti mamandar, reanımatolog, neırohırýrg, travmatologtar em jasady.
