Almaty - Bishkek trassasynda bir adam mert boldy, úsheýi aýrýhanada
ALMATY. QazAqparat - Almaty-Bishkek tasjolynda eki kóliktiń soqtyǵysýynan bir adam mert bolyp, 3 adam túrli dene jaraqatymen aýrýhanaǵa jetkizildi, dep habarlaıdy QazAqparat tilshisi.
Almaty oblystyq Polıtsııa departamentiniń málimetinshe, kólik apaty Almaty-Bishkek tasjolynyń 128-shi shaqyrymynda boldy.
«Aldyn ala málimet boıynsha, «Honda Odyssey» kóliginiń 37 jastaǵy júrgizýshisi qarsy jolaqqa shyǵyp ketip, «Mitsubishi Galant» kóligimen soqtyǵysqan. Saldarynan «Mitsubishi Galant» kóliginde otyrǵan 53 jastaǵy jolaýshy alǵan jaraqattarynan oqıǵa ornynda kóz jumdy. Eki kóliktiń júrgizýshisi men taǵy bir jolaýshy aýrýhanaǵa jetkizildi.
Atalǵan fakti boıynsha Qazaqstan Respýblıkasy Qylmystyq kodeksiniń 345-babynyń 3-bóligi «Abaısyzda adam ólimine ákep soqqan jol qozǵalysy erejelerin buzý» boıynsha sotqa deıingi tergeý amaldary bastaldy», - dep habarlady Almaty oblystyq Polıtsııa departamentiniń baspasóz qyzmetinen.
Buǵan deıin Taldyqorǵan – Úshtóbe tasjolynda bolǵan jol apatynan bir otbasynyń úsh múshesi qaza tapqanyn jazǵan edik.
