Almaty - Bishkek trassasynda 4 kólik soqtyǵysty
ALMATY. QazAqparat - Almaty-Bishkek tasjolynda tórt kóliktiń soqtyǵysýynan bir adam mert bolyp, 2 adam zardap shekti, dep habarlaıdy QazAqparat tilshisi.
Almaty oblystyq Polıtsııa departamenti baspasóz qyzmetiniń málimetinshe, jol apaty 30 qyrkúıek kúni saǵat 08:45 shamasynda Jambyl aýdanynda boldy.
«Aldyn ala aqparat boıynsha, «Nıva-2121» avtokóliginiń 47 jastaǵy júrgizýshisi Almaty-Bishkek tasjolynyń 44-shaqyrymynda batys baǵytta kele jatqan. Kenet rýlge ıe bola almaı qalyp, «Foton» júk kóligimen soqtyǵysqan. Odan keıin bar ınertsııasymen sham baǵanyna soǵylyp, joldyń qarsy betinde «BMW-525» jáne «Mitsubishi» kólikterimen soqtyǵysty. «Nıvanyń» júrgizýshisi oqıǵa ornynda kóz jumdy. Jol apatynan «BMW» kóliginiń 22 jastaǵy júrgizýshisi men « Mitsubishi»-diń 44 jastaǵy jolaýshysy da zardap shekti», - dep habarlady Almaty oblystyq Polıtsııa departamentiniń baspasóz qyzmetinen.
QR Qylmystyq kodeksiniń 345-baby 3-bóligi boıynsha qylmystyq is qozǵaldy.
