Almaty-Bishkek avtojoly boıyndaǵy «Aqterek» beketinde geroın tasymaldaýshy ustaldy
ALMATY. Qyrkúıektiń 2-si. QazAqparat /Ádilet Musahaev/ - Almaty-Bishkek avtojolynyń 59 shaqyrymyndaǵy «Aqterek» beketinde jedel izdestirý jumystary barysynda 1 keli 750 gramm geroın alyp bara jatqan Qyrǵyzstan eliniń azamaty ustaldy,
dep habarlaıdy QazAqparat Almaty oblysy KBD baspasóz qyzmetine silteme jasap.
Almaty oblysy Kedendik baqylaý departamenti kontrabandamen kúres basqarma qyzmetkerleri aımaqtyq jedel qadaǵalaý bólim mamandarymen birlesip júrgizgen operatsııa barysynda Qordaıdan Almatyǵa bet alyp bara jatqan «Aýdı-100» markaly avtokólikten esirtki zattaryn tapqan.
Kólikte 1987 jyly týǵan qyrǵyzdyń Osh qalasynyń azamaty bolǵan. Jeke tekserý jumystary kezinde T. esimdi azamat denesine esirtki zattaryn orap alǵandyǵy anyqtalǵan.
"Áleýmettik jaǵdaıynyń nasharlyǵy ustalýshyny osyndaı áreketterge ıtermelegen. Mardymsyz aqshaǵa bola ol Baha esimdi esirtki saýdalaýshynyń tapsyrmasyn oryndaýǵa kelisken. Onyń denesine geroındi orap, qolyna 500 AQSh dollaryn ustatyp, belgilegen jerge taýardy tapsyrý úshin Almatyǵa attandyrǵan", deıdi Almaty oblysy KBD-niń mamany Anarbek Bekishev.
