Almaty bilim basqarmasy ata-analarǵa mektep bitirý keshine qatysty úndeý jasady

ALMATY. QazAqparat - Erteń orta bilim beretin barlyq uıymdarda oqý jyly aıaqtalady. 26 mamyrdan bastap 9, 11-synyp oqýshylary emtıhandaryn tapsyrady. Al qalǵan synyp oqýshylary úshin 17 maýsymǵa deıin jalǵasatyn jazǵy mektep uıymdastyrylady. Bul týraly Almaty qalalyq Bilim sapasyn qamtamasyz etý departamentiniń basshysy Gúlnar Ermekbaeva aıtty, dep habarlaıdy QazAqparat tilshisi.

«Bilim berý sapasyn arttyrý jáne pandemııa, shekteý sharalary kezeńinde jiberilgen bilimdegi olqylyqtardyń ornyn toltyrý maqsatynda 2022 jylǵy 26 mamyr men 17 maýsym aralyǵynda 1-8, 10 synyp oqýshylary úshin árbir bilim berý uıymynyń jazǵy mektebinde oqytý uıymdastyrylady»,- dedi ol.

Al 9, 11-synyp oqýshylary úshin qorytyndy emtıhandar bekitilgen kestege sáıkes, 9-synyptarda 28 mamyrdan 6 maýsymǵa deıin, 11-synyptarda 27 mamyrdan 10 maýsymǵa deıin ótkiziledi.

«QR Bilim jáne ǵylym mınıstrliginiń mektep bitirý keshin ótkizý boıynsha usynystaryna nazar aýdarǵym keledi. Bıyl mektep bitirý keshi mektep qabyrǵasynda bolady, al attestattardy tapsyrý saltanaty 16-17 maýsymda ótedi. Mektepti bitirýge qatysty barlyq sharalar mektep qabyrǵasynda ótkizilýi kerek. Túlekterdiń ata-analaryna bul is-sharalarǵa shyǵyndaný tıimsizdigi týraly eskertemiz», - dedi Gúlnar Ermekbaeva.

Onyń aıtýynsha, mektep bitirý keshin bilim berý uıymy óz kúshimen uıymdastyrady. Іs-sharaǵa anımatorlardy, merekelik agenttikterdi, aqyly ártisterdi shaqyrýǵa, merekelik otyrystar uıymdastyrýǵa, jalǵa alynǵan avtomobılderde ekskýrsııalar ótkizýge jol berilmeıdi.

«Sondyqtan muǵalimderge, mektepke syılyqtar jınaýǵa qatań tyıym salynǵanyn atap ótkim keledi. Mektep bitirý is-sharalaryn aıaqtaý jáne ótkizý máseleleri boıynsha departamenttiń call-ortalyǵyna kóptegen suraqtar kelip túsýde, onda barlyǵyna oqý jylynyń aıaqtalýy boıynsha túsinikteme beremiz», - dep atap ótti Almaty qalasynyń bilim berý sapasyn qamtamasyz etý departamentiniń basshysy.