Almaty bıligi uzaqqa sozylǵan jol qurylysyna qatysty túsinik berdi

ALMATY. QazAqparat - Almaty turǵyndary qazylǵan kósheler men uzaqqa sozylǵan jol jóndeý jumystaryna jappaı narazylyq bildirip jatyr, dep habarlaıdy QazAqparat tilshisi.

Áleýmettik jeli arqyly pikirlerin bildirgen olardyń deni jumysty aıaqtaýǵa asyqpaǵan jumyskerlerdi kinálaýda.

Azamattardyń narazylyǵy boıynsha QazAqparat tilshisi qala ákimdiginen jaýap alǵan edi.

Málim etilgendeı, bıyl qalada jyldaǵydan úsh ese artyq kólemde jóndeý jumystaryn júrgizý josparlanǵan. Mundaı yńǵaısyzdyqtardyń týyndap jatqany da sol sebepti.

Al qurylysshylardyń áreketsizdigin ákimdiktegiler jalqaýlyq emes, demalys kúnderge yńǵaılanǵan jumys kestesi dep túsindirdi. Qalada keptelis bolmaý úshin qurylys jumystary demalys kúnderi jandanady eken.

Almaty ákiminiń orynbasary  Erlan Áýkenovtyń aıtýynsha, bıyl qalada tartylǵan ınjenerlik jelilerdiń kólemi tarıhta bolmaǵan kórsetkishke jetti.

«Jańa jylytý maýsymyna deıin 32 shaqyrym jylý jelisin jóndeý josparda bar. Bul byltyrǵydan 2,7 ese kóp. Jelilerge jańa qubyrlar ornatylyp jatyr. Zamanaýı qubyrlar 40 jylǵa deıin tozbaıdy. Jol qozǵalysyn shekteýdi azaıtý úshin jumystar kóbine demalys kúnderine keltiriledi. Onda da kósheler 72 saǵatqa ǵana jabylady.

Bıyl «Áıgerim», «Uljan 1, 2», «Qarasý», «Aqbulak», «Darhan», «Qurylysshy», «Ójet», «Trýdovık», «Shańyrak 1, 2», «Altyn Besik», «Dostyq» shaǵyn aýdandarynyń turǵyndaryn sýǵa qosatyn 380 shaqyrym sý jelisi tartylady. Jazdyń aıaǵyna deıin 97 myń sharshy metr trotýar, 146 shaqyrym jol salynady», - dedi ol.

Bıyl 317 shaqyrym sý jelisi men 265 shaqyrym káriz jelisine 25,5 mlrd teńge bólingen.