Almaty bıligi úsh jylda 1 myńnan astam jańa avtobýs satyp aldy
ALMATY. QazAqparat - Búgin Almaty ákimi Baýyrjan Baıbek jolaýshy tasymaldaýshy kompanııalar satyp alǵan jańa avtobýstardy kórdi, dep habarlaıdy QazAqparat tilshisi.
Qala basshysy shet aımaqtardy ortalyqpen baılanystyrýǵa baǵyttalǵan qoǵamdyq kólik ınfraqurylymyn da baǵalady.
Búginde jekemenshik tasymaldaýshylar avtobýs parkin jańartýǵa bar kúshterin salyp jatyr.
Máselen,«Madına» JShS Yutong markaly tómen edendi 12 avtobýs satyp aldy. Kólikter №72 baǵytta qyzmet kórsetedi. «Kıikbaı» JShS №13 baǵyttaǵy avtobýstardy jańartyp, ISUZU markaly tómen edendi 20 kólik aldy.
Baýyrjan Baıbek birinshi kezektegi mindet qalalyqtarǵa sapaly qyzmet kórsetý ekenin atap ótti. Onyń aıtýynsha, qalada úsh jyl ishinde 1100-den astam kólik alynǵan.
«Sapaly qyzmet kórsetip, avtoparkti jańartqan tasymaldaýshylar ǵana sýbsıdııa alatyn bolady. Sýbsıdııa bólý jónindegi kelisimde sapaǵa baqylaý qoıylatyndyǵy ári kemshilikter oryn alsa aıyppul salynatyndyǵy naqtyly kórsetilgen. Tek 9 aı ishinde ǵana qozǵalys jıiligin saqtamaǵan tasymaldaýshylar 330 mln teńge sýbsıdııadan qaǵyldy» - dedi ol.
Jyl aıaǵyna deıin Almatyda jańarǵan qoǵamdyq kóliktiń úlesi 87 paıyzǵa jetetin bolady. Eske salsaq, bıylǵy qazan aıynyń sońynda qalaǵa 200 jańa avtobýs jetkizilgen edi. Sondaı-aq osydan bir aı buryn qala kóshelerine 18 metrlik avtobýstar shyqty.
