Almaty bıligi ortalyqty qaıta jasaýǵa 8 mlrd teńge jumsaǵan
ALMATY. QazAqparat - Almatyda qalanyń tarıhı ortalyǵyndaǵy 5 kósheni qaıta jasaýǵa 8 mlrd teńge jumsalǵan. Bul týraly blog týr barysynda Qalalyq Sáýlet jáne qala qurylysy basqarmasy basshysynyń orynbasary Almashan Ahmetjanov aıtty.
Onyń aıtýynsha, jumys áli tolyq bitpegendikten, qarjy da tolyq ıgerilgen joq.
«Osy 5 kósheni qaıta jasaý jobasynyń quny 8 mlrd teńge. Negizgi soma granıtten jasalǵan kespetastarǵa jumsaldy. Óıtkeni, qalyńdyǵy 8 sm bolatyn granıt tastardyń tózimdiligi óte myqty. Jaramdylyq merzimi 50 jylǵa deıin jetedi. Sondyqtan, bul jaı asfalt tóseı salýǵa jatpaıdy. Paıdalanylǵan materıaldardyń tózimdiligi jobanyń basty baǵyttarynyń biri», - dedi Almashan Ahmetjanov.
Qala ákimi baspasóz qyzmetiniń jetekshisi Tımýr Bazarbaev kóshede nelikten aǵash otyrǵyzylmaǵanyn aıtyp ótti.
«Granıt tósemelerdiń ústinen aǵash otyrǵyzatyn arnaıy oryndar belgilengen. Qazir otyrǵyzbaǵan sebebimiz, tal jersinip ósip ketýi úshin kúzgi mezgil tıimdi. Qazir otyrǵyzsaq, olar óspeı qalýy múmkin. Al, arnaıy oryndardy ashyq qaldyrmaǵan sebebimiz, ol jerge adamdar qoqys tastap lastamasyn degen maqsat boldy. Bıyl qazan aıynda Jibek joly kóshesine deıin jóke, úıeńki, sheten sııaqty 1100 tal otyrǵyzylady. Taǵy 700 tal bıznestiń áleýmettik jaýapkershiligi aıasynda otyrǵyzylady», - dedi Tımýr Bazarbaev.
Panfılov kóshesinde qazir oryndyqtar, túrli arhıtektýralyq pishinder qoıylǵan. Kóshe shamdary jańartylǵan.
Panfılov kóshesi boıymen Qabanbaı batyr kóshesinen bastap Jibek jolyna deıingi aralyqta demalatyn oryndar, sport jáne balalar alańdary, abattandyrylǵan velojoldar paıda bolǵan. Sondaı-aq, jaıaý júrgin jolynda qurǵaq sýburqaqtar iske qosylǵan. Aryq júıeleri jańartylyp, barlyq ınjenerlik ınfraqurylym almastyryldy.
Kóshe ashylǵaly beri bul jerde turǵyndar, qonaqtar demalys ýaqyttaryn ótkizip júr.
Ala jazdaı júrgizilgen jumystardyń arqasynda qalanyń tarıhı ortalyǵynyń 1/3 bóligi qaıta jańǵyrtyldy.
