Almaty bıligi mádenıet salasyna engizgen depýtattardyń túzetýlerimen kelispeıdi
ALMATY. QazAqparat - Mádenıet máseleleri boıynsha depýtattyq túzetýlerdiń keıbir tarmaqtarymen Almaty qalasynyń bıligi kelispeıdi, dep habarlaıdy «QazAqparat»HAA tilshisi.
Bul jóninde «Qazaqstan Respýblıkasynyń keıbir zańnamalyq aktilerine ózgerister men tolyqtyrýlar engizý týraly» Zań jobasyna depýtattyq túzetýlerdi talqylaý boıynsha jumys tobynyń kóshpeli otyrysy barysynda Almaty qalasy ákiminiń orynbasary Arman Qyryqbaev málim etti. Buryn depýtat Beıbit Mamyraev ýákiletti organǵa (bul jaǵdaıda QR Mádenıet jáne sport mınıstrligi) mádenı memlekettik uıymdaryn qurý, qaıta qurý jáne taratý boıynsha quzyrettilik berýdi jáne osy máseleni ýákiletti organmen kelisýdi usynǵan. Aıtýynsha, 2013-2015 jyldar arasyndaǵy kezeńde 40 mádenı nysan jabylǵan. Mádenıet jáne sport vıtse-mınıstri Aqtoty Raıymqulova mınıstrlik atynan osy normany qoldady. Biraq osy usynyspen Almaty qalasynyń bıligi tolyqtaı kelispeı otyr.
«Jalpy tujyrymdyq nysanda osy normany qoldasa da bolatyn edi, biraq mádenı nysandardy salý, ashý máselesin kelisý mindetti emes dep esepteımin. Jabý máselesi boıynsha kelisemin, ony ýákiletti organmen kelisý qajet. Al árbir qadamyńdy kelisý, bul endi artyq. Onyń ústine bıýdjet jergilikti bolsa», - dedi óz sózinde Almaty qalasy ákiminiń orynbasary Arman Qyryqbaev. Talqylana kele osy norma pysyqtaýǵa jiberildi.
Otyrys jumysyna Parlament Májilisi tóraǵasynyń orynbasary Gúlmıra Isımbaeva, Áleýmettik-mádenı damytý komıtetiniń tóraǵasy Gúlnar Yqsanova, Parlament Májilisiniń depýtattary, Mádenıet jáne sport vıtse-mınıstri Aqtoty Raıymqulova, Almaty qalasy ákiminiń orynbasary Arman Qyryqbaev, mádenıet jáne sport, ádilet, qarjy, bilim jáne ǵylym mınıstrlikteriniń, qalanyń mádenıet basqarmasynyń jaýapty qyzmetkerleri, qoǵam jáne mádenıet qaıratkerleri, mádenı memlekettik uıymdar jáne mádenıet salasyndaǵy bilim berý uıymdarynyń, shyǵarmashylyq odaqtardyń basshylary, Parlamentke kirmegen saıası partııalar, qoǵamdyq birlestikter, úkimettik emes uıymdar, BAQ ókilderi, sarapshylar qatysty.
