Almaty bıligi qurylys salasyndaǵy qazaqstandyq qamtýdy 70%-ǵa jetkizbek

Sharaǵa qalalyq kásipkerler palatasynyń, qurylys kompanııasynyń ókilderi jáne taýar óndirýshiler qatysty.

Jınalǵandar otandyq taýar óndirýshilerdiń memlekettik satyp alýǵa qatynasýyn, jekemenshik kompanııalardyń jumysyn tilge tıek etti.

Kóptegen kásipkerlerdiń aıtýynsha, merdigerlerdiń arasynda sheteldik kompanııalardyń múddesin qorǵaıtyndar jeterlik. Ári konkýrstyq ótinimnen negizsiz bas tartady. Uzaq merzimdi kelisimshart jasaýdyń múmkin emestigi jáne bar.

Taraptardyń kezdesýi barysynda taýar, qyzmet kórsetý, jumys salasynda qazaqstandyq kásiporyndardyń memlekettik satyp alýǵa qatysýyn ulǵaıtý máselesi kóterildi.

Qurylys basqarmasynyń habarlaýynsha, 2015 jyly atalǵan kórsetkish 53% bolǵan. Bıyl bul kórsetkishti 70%-ǵa jetkizý kerektigi aıtyldy.

Aıta ketý kerek, Almatyda memlekettik-jekemenshik áriptestiktiń arqasynda 25 balabaqsha, 4 mektep, 1 emhana salyndy. Turǵyn úı qurylysyna baǵyttalǵan 142,8 mlrd. teńge ınvestıtsııanyń 22,1 mlrdy (15%) bıýdjet qarjysy, 120,7 mlrdy (85%) jekemenshik ınvestıtsııalar.

Jergilikti taýar óndirýshi kompanııalarǵa jeke kapıtaldyń qarjysyna salynyp jatqan jobalarǵa qatysýǵa usynys bildirildi.

8 aqpanda otandyq taýar óndirýshilerdiń densaýlyq saqtaý salasyndaǵy memlekettik satyp alýǵa qatysyn arttyrýǵa arnalǵan jıyn ótken bolatyn.

Jyldyń ortasyna deıin energetıka, bilim berý, tabıǵatty paıdalaný salasyndaǵy qazaqstandyq qamtýdyń úlesin arttyrý talqylanatyn bolady.