Almaty bıligi dala órtiniń beleń alýyna alańdaýly
ALMATY. QazAqparat - Almatyda qyrkúıek aıynda qurǵaq shóptiń órtenýi jıilep ketti, dep habarlaıdy QazAqparat tilshisi.
Qala bıligi dala órtiniń aldyn alýǵa birqatar tapsyrma berdi.
Mamandardyń aıtýynsha, qalada jyl saıyn shamamen 500 órt oqıǵasy tirkeledi. Kóbinese mundaı órtten qorshaǵan ortadan bólek, saıajaı turǵyndary da zardap shegedi eken.
TJD taratqan aqparatqa sáıkes, bıyl 517 dala órti bolǵan. Barlyǵy 73 ga jerdi tilsiz jaý jaramsyz etken.
Bul másele týraly qalalyq TJD basshylyǵy ákimniń orynbasary Erlan Áýkenovke baıandady.
«Ákimniń orynbasarynyń jetekshiligimen shtab quryldy. Kartaǵa dala órti jıi kezdesetin urymtal 16 ýchaske belgilendi. Atalǵan ýchaskeniń aýdanbasylaryna arnaıy tapsyrma berildi. Órt negizinen shóptiń mezgilinde shabylmaýynan tez tarap ketedi. Osy maqsatta shóp shabýǵa, or qazýǵa Alataý, Medeý, Bostandyq, Túrksib aýdandarynda arnaıy tehnıka sany kóbeıtildi», - dedi TJD baspasóz qyzmeti.
