Almaty bazaryndaǵy alapat órt sóndirildi
ALMATY. QazAqparat - Almatydaǵy «baraholka» bazarynan shyqqan órt sóndirildi, dep habarlaıdy QazAqparat tilshisi.
Almaty qalalyq tótenshe jaǵdaılar departamentiniń habarlaýynsha, oqıǵa ornynda jeke quramnyń 86 qyzmetkeri, 25 tehnıkasy men qalanyń ózara is-qımylynyń búkil kúsh-quraldary jumyldyryldy.
Jalyndy aýyzdyqtaý úshin 3 ýchaske quryldy. Órt oshaǵyn anyqtaýǵa teplovızorlar qoldanyldy.
Otqa oranǵan qoımanyń beton konstrýktsııalarynyń qulaý qaýpi bolǵandyqtan órt sóndirýshiler qaýipsizdik tehnıkasyn saqtaýǵa erekshe nazar aýdardy.
«Qabyldanǵan jedel sharalardyń arqasynda kúrdeli órt 1 saǵat 9 mınýt ishinde sóndirildi. Qyzyl jalyn 1,5 myń sharshy metr aýmaqty sharpydy. Zardap shekkender joq»,- dep habarlady qalalyq TJD baspasóz qyzmeti.
Eske sala keteıik, Almatynyń «baraholka» bazary búgin tańerteńnen beri órtenip jatqanyn habarlaǵan bolatynbyz.
