Almaty bazarynan 100 mln teńgeniń altyn buıymdary urlandy
Jetisý aýdandyq Polıtsııa basqarmasynyń málimetinshe, qaladaǵy bazarlardyń birinde zergerlik buıymdardyń iri urlyǵy jasalǵan.
«QR QK-niń 188-baby 4-bóligi (Urlyq) boıynsha tergelip jatqan qylmystyq is materıaldaryna sáıkes, qaskóı túnde altyn satatyn qatarǵa kirip, 8 saýda ornynyń shyny sórelerin syndyrǵan. Solaı jalpy somasy 100 mln teńgeniń zergerlik buıymdaryn alyp ketken.
Bul qylmysty ashý maqsatynda tergeý-jedel toby quryldy. Bazardaǵy beınebaqylaý júıelerine taldaý jasaldy. Kúdiktiniń jeke basy birden anyqtaldy. Bul – 35 jastaǵy A. esimdi azamat. Ol Qonaev qalasyndaǵy qonaqúılerdiń birinde ustaldy. Kúdikti sol jerde ýaqytty ótkizýdi josparlaǵan kórinedi», – dedi Jetisý aýdandyq polıtsııa basqarmasynyń bastyǵy Darhan Musanov.
Ol urlanǵan altyn buıymdardy qala shetindegi ıen dalaǵa jasyrǵan. Zattaı aıǵaqtar tárkilendi. QR QPK-niń 128-babyna sáıkes kúdikti ýaqytsha ustaý ızolıatoryna qamaldy. Bultartpaý sharasy retinde «qamaýǵa alý» sanktsııalandy.