Almaty bazarlarynda sibir jarasy aýrýy juqqan etterdiń bar ekendigi shyndyqqa janaspaıdy - Almatynyń bas mal dárigeri
ALMATY. QazAqparat - Áleýmettik jelilerde sibir jarasy aýrýy juqqan etterdiń Almaty bazarlarynda satylymǵa shyǵarylyp jatqandyǵy týraly aqparattar shyndyqqa janaspaıdy. Bul týraly Almaty qalasy Aýyl sharýashylyǵy jáne veterınarııa basqarmasy basshysynyń mindetin atqarýshy, Almaty qalasynyń bas mal dárigeri Baýyrjan Abyzbaev málim etti.
Onyń aıtýynsha, qazirgi ýaqytta Almaty qalasynyń aýmaǵynda mal dárigerlik-sanıtarlyq saraptamasy bar 24 azyq-túlik bazary shoǵyrlanǵan.
«Barlyq ákelinetin janýartekti ónimder, olardyń ishindegi et jáne et ónimderi qatań túrde mal dárigerlik-sanıtarlyq saraptamadan ótkiziledi. Sonymen qatar, Basqarmanyń memlekettik mal dárigerleri qaladaǵy barlyq et óńdeýshi kásiporyndar men saýda jelilerinde kún saıyn tekserý júrgizip turady. Qalanyń mal dárigerlik-sanıtarlyq qaýipsizdigin barlyǵy 35 memlekettik mal dárigeri qamtamasyz etedi. Olar qalaǵa jetkiziletin ónimderge kúndelikti baqylaý júrgizedi. Baqylaýdy kúsheıtý maqsatynda basqarmanyń mal dárigerlik-sanıtarlyq saraptama zerthanalary men memlekettik mal dárigerleri tańǵy saǵat 4.00-den bastalatyn kúsheıtilgen jumys tártibine kóshirildi.
Almaty bazarlaryna aptasyna orta eseppen 240 tonnadan asatyn mal sharýashylyǵy ónimderi jetkiziledi. Olardyń basym bóligi Almaty, Jambyl jáne Ońtústik Qazaqstan oblystarynan ákelinedi. Barlyǵynda qaýipsizdigin rastaıtyn veterınarııalyq qujattary bar.
Almaty qalasynyń aýmaǵynda búgingi tańda barlyǵy 2944 bas - iri qara mal, 1759 bas - usaq qara mal, 569 bas - jylqy, 22 bas - túıe jáne 177 bas - shoshqa tirkelgen. Olardyń barlyǵyna bıyl mamyr aıynda, josparǵa sáıkes, sibir jarasy aýrýyna qarsy egý júrgizildi. Búgingi tańda sibir jarasy aýrýy tirkelgen aımaqtardan et ónimderin alyp kelý faktileri, sondaı-aq Almaty qalasy Densaýlyq saqtaý basqarmasynyń aqparatyna sáıkes, turǵyndar arasynda túıneme aýrýynyń belgilerimen aýrýhanaǵa jatqyzylǵandar tirkelgen joq.
Almaty qalasy Aýyl sharýashylyǵy jáne veterınarııa Basqarmasy men Almaty qalasy tutynýshylardyń quqyqtaryn qorǵaý departamenti qala turǵyndaryna mal sharýashylyǵy ónimderin bazarlarda jáne arnaıy saýda ortalyqtarynda satyp alý qajettigin málimdeıdi. Sáıkesinshe, et ónimderin jabaıy saýda oryndarynan satyp almaý qajet», - dedi óz málimdemesinde B. Abyzbaev.
Aıta ketelik, sibir jarasy janýarlardyń asa qaýipti juqpaly aýrýy. Onyń koıǵa juǵatyn túrin - topalań, jylqyda - jamandat, iri karada - karatalak, túıede - aqshelek, karabez dep ataıdy. Onymen adam da (túıneme, kúıdirgi) aýyrady. Sibir jarasy keń taraǵan indet.
