Almaty aımaqtyq balalar aýrýhanasyna jańa jabdyq berildi

ALMATY. QazAqparat - «AıALA» qaıyrymdylyq qory Almaty aımaqtyq balalar aýrýhanasyna ómirlik mańyzdy medıtsınalyq jabdyqtar - 4 mln. 402 myń teńgege ońaltý ústelderi men fototerapııa apparattaryn tapsyrdy.

Jańa týǵan sábıler úshin ońaltý ústeli - perzenthanalardyń ońaltý bólimsheleri jasraqtandyrý úshin arnaıy jasalǵan kúrdeli medtsınalyq apparat. Ol sábılerdi kútýge yńǵaıly ári jylý men jaılylyq kózi. Fototerapııa apparattary jańa týǵan sábılerdegi sary aýrýdy emdeýge arnalǵan.

«Bizdiń jańa týylǵan jáne shala týǵan sábıler patologııa bóliminde qazir 20 adam jatyr. Olarǵa keminde 10 ońaltý ústelderi qajet. Al bizde ázirge bireý ǵana. Al fototerapııa apparaty bizde tipti bolǵan joq. Al bizdiń bólimshege túsken árbir ekinshi sábı sary aýrýǵa shaldyqqan», - dedi neonatologııa bóliminiń meńgerýshisi Aınur Álimbekova.

Almaty aımaqtyq balalar aýrýhanasy 2011 jylǵy qarashadan beri jumys jasap keledi. «100 mektep, 100 aýrýhana» baǵdarlamasy aýqymynda salynǵan mekeme Almaty oblysynyń ońtústik aýdandarynda turatyn sábılerge medıtsınalyq kómek kórsetýge arnalǵan.

Jabdyqtardy tapsyrý «Ómir syılaıyq» jobasynyń aýqymynda Qazaqstannyń balalar aýrýhanalarynyń ońaltý bólimderine kómek kórsetý maqsatynda júrgizildi. Ol 2007 jyly «AıALA» qory Almaty qalalyq juqpaly aýrýlar aýrýhanasynyń ońaltý bólimshesin medıtsınalyq jabdyqtarmen jaraqtandyrý kezinde bastaldy. Jańa jabdyqtyń kómegimen balalar ólimi tórt ese azaıdy. 2011 jyly jobanyń shekarasyn Almatydan tys jerlerge keńeıtý uıǵaryldy.